کشمیریوں کا ڈرختم ہوچکا میں دنیا میں کشمیرکا سفیر بن کرجاؤں گا اور بتاؤں گا کہ آرایس ایس کی اصلیت کیا ہے؟ مظفر آباد میں عوام سے عمران خان کاخطاب
اسلام آباد،15؍ستمبر(ایس او نیوز؍ایجنسی) کشمیر سے دفعہ 370کے خاتمہ کے اعلان کو غلط ثابت کرنے کیلئے پاکستانی وزیر اعظم عمران خان اقوام متحدہ کی سلامتی کونسل سے خاطر خواہ جواب ملنے کے بعد پوری دنیا کے اہم اداروں کے دروازے کھٹکھٹانے پر مجبور ہیں -انہوں نے اپنے پروگرام کے مطابق قوم سے خطاب کے دوران کہا کہ مودی سن لو!کشمیریوں کا ڈرختم ہوچکا، آپ انہیں شکست نہیں دے سکتے، میں دنیا میں کشمیر کا سفیر بن کرجاؤں گا اور دنیا کو بتاؤں گا کہ آر ایس ایس کی اصلیت کیا ہے؟ہندوستانی فوج کو بتانا چاہتا ہوں کہ وادی میں انتہاپسندی اٹھے گی، کیونکہ آپ جن کے اوپر ظلم کررہے ہیں، وہ ظلم کے خلاف لڑیں گے-انہوں نے مظفر آباد میں پاک مقبوضہ کشمیری عوام سے خطاب کرتے ہوئے کہا کہ میں پہلے پاکستانی ہوں، پھر مسلمان ہوں، کشمیر کا مسئلہ انسانیت کا مسئلہ ہے- مودی سن لو، ایک بزدل انسان ہی ظلم کرتا ہے، کشمیر میں 9لاکھ فوج تعینات اور 40دنوں سے کشمیریوں کو گھروں میں بند کیا ہوا ہے- ایک دلیر انسان اور انسانیت رکھنے والا بچوں اور عورتوں پر ظلم نہیں کرسکتا- انہوں نے کہا کہ نریندر مودی کومیں پیغام دینا چاہتا ہوں کہ جتنا مرضی چاہے ظلم کرلو، آپ کامیاب نہیں ہوں گے، کیونکہ کشمیر ی عوام سے موت کا خوف ختم ہوچکا ہے، ان کا ڈر چلا گیا ہے، انہیں اب آپ شکست نہیں دے سکتے، آپ جو مرضی چاہے کرلیں - ہم سب کو پتا ہونا چاہیے کہ مودی آر ایس ایس کا بچپن کا ممبر ہے، یہ وہ جماعت ہے جس میں مسلمانوں کے خلاف نفرت ہے، جب 100سال پہلے یہ جماعت بنی تو اس کا مقصد تھا کہ ہندوستان صرف ہندوؤں کاہو، ان کے دلوں میں مسلمانوں کی نفرت بھری ہے، ان کے مطابق اگر مسلمانوں کی صدیوں سے ہندوستان میں حکومت نہ ہوتی - شاید ہندوستان بڑا سپر پاور بن چکا ہوتا-یہ مسلمانوں کو ہندوستان میں حکومت کرنے کا سبق سکھانا چاہتے تھے- میں مودی کو کہنا چاہتا ہوں کہ میں دنیا میں کشمیر کا سفیر بن کرجاؤں گا اور دنیا کو بتاؤں گا کہ آر ایس ایس کی اصلیت کیا ہے؟یہ بھی ہٹلر کے راستے پر چل رہے ہیں، آر ایس ایس کے بانی ہٹلر کو رول ماڈل مانتے تھے-آر ایس ایس کے نظریے کا نقصان ہندوستانیوں کو ہوگا، کیونکہ ماڈریٹ لوگوں کا زیادہ نقصان ہے-عمران خان نے مزید کہا کہ اسی آر ایس ایس نے گاندھی کا قتل کیا تھا-اقوام متحدہ کی سکیورٹی کونسل میں 50سال بعد کشمیر ایشو پر بات ہوئی ہے-پہلی بار یورپی یونین نے کہا کہ کشمیر کا مسئلہ اقوام متحدہ کی قراردادوں کے مطابق حل ہونا چاہیے-برطانوی اراکین نے آواز اٹھائی- امریکی صدر کو ان کے سینیٹرز نے خط لکھا کہ کشمیر میں مداخلت کریں، اگلے ہفتے میں اقوام متحدہ کی جنرل اسمبلی میں جا رہا ہوں - انشاء اللہ کشمیریوں کو مایوس نہیں کروں گا-کشمیریوں کیلئے وہ موقف اختیارکروں گاجو آج تک کسی نہیں لیا ہوگا-انٹرنیشنل میڈیا پر کشمیر کی ہرموقع پر بات کروں گا- آج روسی میڈیا اور کل الجزیرہ ٹی وی پر میرا انٹرویو سن لینا-پاک مقبوضہ کشمیر کے وزیر اعظم نے کہا کہ ہندوستانی فوج کو بتانا چاہتا ہوں کہ یہاں سے انتہاپسندی اٹھے گی، جن کے اوپر ظلم کررہے ہیں، وہ ظلم کے خلاف لڑیں گے- دفعہ370کے بعد شملہ معاہدے کی کوئی اہمیت نہیں ہے-شملہ معاہدہ اپنی موت آپ مرچکا ہے- مودی ہمارے حوصلے کو توڑ نہیں سکتے، محرم کا مہینہ ہے امام حسین کی قربانی ہمیں یاد دلاتی ہے کہ ظلم کے آگے سرنہیں جھکانا- وزیرخارجہ شاہ محمود قریشی نے جلسے سے خطاب کرتے ہوئے کہا کہ مودی کیا تم سرینگر میں خطاب کرسکتے ہو؟ہندوستان دعویٰ کررہاہے کہ مذہبی آزادی ہے، لیکن کشمیر میں عاشورہ کا جلوس نہیں نکلنے دیا گیا،کیا دنیا نے نہیں دیکھا کہ مقبوضہ کشمیر میں عید اور جمعہ کی نمازیں نہیں پڑھنے دی جاتیں،مساجد کو تالے لگا دیے جاتے ہیں -کشمیر میں 10لاکھ فوجیوں کو کیوں تعینات کیا گیا؟انہوں نے کہا کہ وزیراعظم عمران خان اقوام متحدہ میں جائیں گے اور کشمیریوں کا مقدمہ بھرپورانداز میں پیش کریں گے-