’وی دی پیوپل‘کے زیر اہتمام آئین کے تحفظ کے لئے کل منگلورو میں ہوگاستیہ گرہ اور انسانی زنجیر کے ذریعے احتجاج
منگلورو29/جنوری (ایس او نیوز) کل 30جنوری کو مہاتما گاندھی کی برسی کے موقع پر’وی دی پیوپل‘ کے زیراہتمام منگلورو میں ڈپٹی کمشنر دفتر کے احاطے میں دستور ہند کے تحفظ کے ستیہ گرہ اور انسانی زنجیر کے ذریعے احتجاجی مظاہرہ کیا جائے گا۔
اخباری بیان کے مطابق ستیہ گرہ صبح سے شروع ہوگی اور شام 4.30بجے”تشدد کے خلاف اتحاد“ کے نعرے کے عنوان سے انسانی زنجیر بنانے کے لوگ جمع ہوں گے۔اس موقع پر بات کرتے ہوئے ساجدہ مومن نے کہا کہ گاندھی کے قتل کو 7دیائیاں گزرگئی ہیں۔لیکن ادھر پچھلے کچھ عرصے سے گاندھی کی امیدوں سے کنارہ کشی کرنے اور گوڈسے کی سراہنا کرنے والے افراد عوامی نمائندے منتخب ہورہے ہیں، اور یہ ایک خطرناک رجحان ہے۔ اسی لئے گاندھی کے نظریات اور دستور ہند کے تعلق سے بیداری پیدا کرنے کے لئے ستیہ گرہ منعقد کرنے کا پروگرام ترتیب دیا گیا ہے۔صبح 10سے تقریباً ایک سو خواتین ڈی سی کے دفتر کے باہر’خاموش ستیہ گر ہ‘ پر بیٹھیں گی۔ اس میں کسی بھی قسم کی نعرے بازی یا مائک کا استعمال نہیں ہوگا۔30جنوری شام 5.17بجے گاندھی جی کو قتل کیا گیا تھا اس لئے اسی وقت انسانی زنجیر بنائی جائے گی۔
ساجدہ مومن نے مزید کہا کہ گاندھی کے بغیر آزادی کی جدوجہد کا ہم تصور بھی نہیں کرسکتے۔انہیں اپنی گولی کا نشانہ بنانے والے گوڈسے کی اُس وقت کوئی حمایت نہیں کررہا تھا۔لیکن آج دیش پریمیوں کی جگہ گوڈسے اور اس کے نظریات کے پریمیوں کی تعداد بڑھ گئی ہے۔امبیڈکر نے دیش کے پہلے وزیر قانون اور دستوری کمیٹی کے چیرمین کے طور پر ایک بہترین دستور تشکیل دیا۔مگر آج گوڈسے پریمی اس دستور کی بے عزتی کرنے اور اس پر سوال اٹھانے لگے ہیں۔دستور میں ترمیم کرکے بنیادی حقوق چھین لینے کی کوشش کررہے ہیں۔اس موضوع پر عوام کو بیدار اور خبر دار کرنا نہایت ضروری ہوگیا ہے۔
اس موقع پر بات چیت کرتے ہوئے ودیا دینکر نے بتایا کہ اس پروگرام کے لئے تاحال پولیس کی طرف سے اجازت نہیں ملی ہے۔ ڈی سی نے جائزہ لینے کی بات کہی ہے۔ 250افراد پر مشتمل ستیہ گرہ کے لئے پولیس کی اجازت ضروری نہیں ہے۔ اگر ایسا ضروری ہوگا تب بھی ہمیں پولیس کمشنر پر بھروسہ ہے وہ اسے منظوری دیں گے۔
منگلوروپریس کلب میں منعقدہ اس کانفرنس کے موقع پر ٹیری پایاس، سہاسنی ببّو کٹّے، مہر، ماریا فرنانڈیز وغیرہ موجود تھے۔