بھٹکل: زچگی کے دوران خاتون کی موت۔ گھر والوں نے لگایاڈاکٹر پر کوتاہی کا الزام
بھٹکل، 18/اگست (ایس او نیوز) بھٹکل تعلقہ کے شیرالی میں واقع کمیونٹی ہیلتھ سینٹر میں ایک حاملہ خاتون کی موت واقع ہوگئی جس کے بعد متعلقہ خاتون کے رشتہ داروں نے اسپتال کی ڈاکٹر پر کوتاہی برتنے کا الزام لگایا۔
کہا جاتا ہے کہ شیرالی چتراپور کی حاملہ خاتون لتا ناگراج نائک زچگی کے لئے شیرالی کوٹے باگیل میں واقع سرکاری اسپتال میں گئی تھی۔ اسپتال کی ڈاکٹر نے اس کا سیزیرین آپریشن کرکے بچہ نکالا لیکن زچگی کے بعدبہت زیادہ مقدار میں خاتون کا خون بہنے لگا۔ تب ڈاکٹر نے اس کو دوسرے اسپتال میں منتقل کرنے کی ہدایت دی۔ چونکہ 108ایمبولینس میں ہی مریضہ کو لے جانے کی تاکید کی گئی تھی اس لئے ایمبولینس آنے تک آدھے گھنٹے سے زیادہ انتظار کرنا پڑا۔ اس عرصے میں مسلسل خاتون کا خون بہتا رہا۔پھر جب اس کو ایمبولینس میں دوسرے اسپتال کی طرف لے جانے لگا تو راستے میں ہی اس کی موت ہوگئی۔