نئی دہلی،10؍ستمبر (ایس او نیوز؍ایجنسی) دو دن تک کمی کے بعد ملک میں ایک بار پھر کورونا انفیکشن کے معاملوں میں سب سے زیادہ اضافہ دیکھنے میں آیا ہے اور گذشتہ 24 گھنٹوں کے دوران پہلی بار 95 ہزار سے زیادہ نئے معاملے سامنے آئے ہیں ، جس کی وجہ سے متاثرہ افراد تعداد 44.65 لاکھ تک جا پہنچی ہے اور اس عرصے کے دوران اس انفیکشن کی وجہ سے 1،172 افراد کی موت بھی ہوئی ہے۔

جمعرات کو مرکزی وزارت صحت و خاندانی بہبود کے جاری کردہ اعداد و شمار کے مطابق ، ملک میں گذشتہ 24 گھنٹوں کے دوران کورونا انفیکشن کے ریکارڈ 95،735 نئے معاملوں کے ساتھ متاثرہ افراد کی تعداد 44،65،864 ہوگئی ہے۔ اس دوران 1،172 ہلاکتوں سے مرنے والوں کی تعداد 75،062 ہوگئی۔ اس دوران ، 72،939 مریض صحت مند ہوگئے ہیں جس کی وجہ سے کورونا سے راحت حاصل کرنے والے افراد کی تعداد بڑھ کر 34،71،784 ہوگئی ہے۔ فعال معاملے 21،624 اضافے سے 9،19،018 ہوچکے ہیں کیونکہ صحت مند افراد کے مقابلے انفیکشن کے نئے معاملوں کی تعداد زیادہ ہے ۔

ملک میں فعال معاملوں کی تعداد 20.58 فیصد اور بازیابی کی شرح 77.74 فیصد ہے جبکہ اموات کی شرح 1.68 فیصد ہے۔

ملک میں کوویڈ 19 سے سب سے زیادہ متاثرریاست مہاراشٹرا میں فعال معاملوں کی تعداد میں زبردست اضافہ ہوا ہے  اور یہ 9،291 بڑھ کر 2،53،100 ہو گئی ہے اور380 ہلاکتوں سے اموات کی تعداد 27،787 ہوگئی ہے ۔ اس مدت کے دوران ، 13،906 افراد انفیکشن سے ٹھیک ہوگئے ہیں ، جس سے صحت مند افراد کی تعداد 6،86،462 ہوگئی۔ ملک میں سب سے زیادہ فعال معاملے اسی ریاست میں ہیں۔

آندھرا پردیش میں ، اس عرصے کے دوران مریضوں کی تعداد میں 502 کا اضافہ ہوا ، فعال معاملے بڑھ کر 97،271 ہوگئے۔ ریاست میں اب تک 4،634 افراد ہلاک ہوچکے ہیں۔ مجموعی طور پر 4،25،607 افراد متاثر ہوئے ہیں۔

جنوبی ریاست کرناٹک میں پچھلے 24 گھنٹوں کے دوران مریضوں کی تعداد میں 2،552 کا اضافہ ہوا ہے اور ریاست میں اب 99،489 فعال معاملے ہیں۔ ریاست میں اموات کی تعداد 6،808 تک جا پہنچی ہے اور اب تک 3،15،433 افراد بازیاب ہوچکے ہیں۔