بی جے پی حکومت نہیں گرائے گی، متبادل حکومت موجودہ حکومت گرنے کے بعد: یڈیورپا
بنگلورو،30/مئی(ایس او نیوز) سابق وزیراعلیٰ اور ریاستی بی جے پی صدر بی ایس یڈیورپا نے کہا ہے کہ بی جے پی ریاست کی مخلوط حکومت کو ہرگز نہیں گرائے گی، لیکن اپنے طور پر اگر حکومت گر جاتی ہے تو وہ خاموش بھی نہیں رہے گی اور متبادل حکومت قائم کرنے کی کوشش ضرور کرے گی۔ اخباری نمائندوں سے بات چیت کرتے ہوئے انہوں نے کہاکہ مخلوط حکومت میں شامل کانگریس اور جے ڈی ایس کے درمیان رسہ کشی اس اتحاد کو لے ڈوبے گی، بی جے پی اس وقت کا انتظار کرے گی۔ انہوں نے کہاکہ جہاں تک حالات کا انہوں نے مشاہدہ کیا ہے یہی بات سامنے آئی ہے کہ مخلوط حکومت بہت زیادہ دنوں تک چلنے والی نہیں ہے۔ ریاست میں حکومت گرنے کے بعد وسط مدتی انتخابات کے امکانات کے بارے میں یڈیورپانے کہاکہ اس کے لئے بی جے پی قطعاً تیار نہیں ہے۔ متبادل حکومت کے قیام کی کوشش کی جائے گی، اس میں اگر کامیابی نہ ہوئی تو متبادل امکانات کا جائزہ لیا جائے گا جس میں صدر راج کا نفاذ اور وسط مدتی انتخابات شامل ہیں۔ انہوں نے کہاکہ کل دہلی میں وزیراعظم مودی کی تقریب حلف برداری میں شرکت کے لئے وہ روانہ ہورہے ہیں۔ ریاستی حکومت کی طرف سے جندال پراجکٹ کو 3700ایکڑ زمین دئے جانے کے معاملے میں یڈیورپانے کہاکہ اس پر 5/جون کو بی جے پی کور کمیٹی میٹنگ میں تبادلہئ خیال ہوگا اور اس کے خلاف بی جے پی کی تحریک کس طرز پر چلائی جائے طے کیا جائے گا۔ یڈیورپا نے توقع ظاہر کی کہ مرکز کی مودی کابینہ میں اس بار کرناٹک سے زیادہ اراکین کو نمائندگی مل سکتی ہے۔