بھٹکل13/اپریل (ایس او نیوز) بھٹکل میں کورونا وائرس سے متاثرہونے والے افراد کی تشخیص کے لئے لیباریٹری کی سہولت دستیاب نہ رہنے کی وجہ سے کافی مشکلات کا سامنا کرنا پڑ رہا ہے۔ اس دوران ہیلتھ ڈپارٹمنٹ کے ذرائع کے مطابق اب یہاں مرض کی تشخیص کے لئے ’اسکریچ کارڈ‘ استعمال کرنے پر غور کیا جارہا ہے۔
یہ کارڈ کب سے استعمال ہونگے اس سلسلے میں کوئی قطعی بات معلوم نہیں ہوئی ہے، البتہ بتایا گیا ہے کہ ڈاکٹروں کے لئے اسکریچ کارڈ کے ذریعے مرض کی تشخیص کرنے کا یہ جدید طریقہ ہے اور اس بارے میں مزید وضاحت ہونا ابھی باقی ہے۔ لیکن چونکہ پورے ملک میں اس پر عمل کرنا ممکن نہیں ہے اس لئے تجرباتی طور اسے بھٹکل جیسے مقامات پر جہاں مریضوں کی تعداد زیادہ ہے، اس طریقے کو استعمال کرنے کی تجویز پرحکومت غور کررہی ہے۔
بھٹکل میں تاحال مشکوک افراد کے جو نمونے حاصل کیے جاتے ہیں انہیں شیموگہ اور بنگلور کی لیباریٹری میں بھیجا جارہا تھا، وہاں تاخیر ہونے یا مشین خراب ہونے کی صورت میں ہاسن کی لیباریٹری میں بھیجا جاتا تھا۔ اب منگلورو کے وینلاک اسپتال میں قائم کی گئی نئی لیباریٹری میں ضلع شمالی کینرا کے نمونوں کی جانچ کرنے کی سہولت فراہم کی گئی ہے۔ اگر بالفرض ان مقامات پر بھیجے گئے نمونے پوزیٹیو نکلتے ہیں تو پھر دوبارہ اس کی تصدیق کے لئے پونے یا بنگلورو میں واقع لیباریٹری کو نمونے بھیجے جاتے ہیں اور وہاں سے رپورٹ ملنے تک مریض اور ڈاکٹروں کے لئے انتظار کرنے کے سوا اور کوئی راستہ باقی نہیں رہتا ہے۔