ممبئی،9اکتوبر(ایس او نیوز/آئی این ایس انڈیا) مہاراشٹر بی جے پی صدر چندرکانت پاٹل نے نیشنل کانگریس پارٹی کے سربراہ شرد پوار پر نشانہ لگایا ہے۔چندرکانت پاٹل نے کہا کہ ریاست اسمبلی کے نتائج کے بعد شرد پوار کا سماجی اور سیاسی کیریئر ختم ہو جائے گا۔چندرکانت پاٹل کولہاپور ضلع میں رادھانگری تحصیل سے شیوسینا کے امیدوار پرکاش ابٹکر کی انتخابی ریلی میں حصہ لینے پہنچے تھے۔انہوں نے کہاکہ اسمبلی انتخابات کے نتائج کے بعد ہم شرد پوار کو سماجی اور سیاسی کیریئر سے مستقل طور پر ریٹائر کر دیں گے۔پوار پر نشانہ سادھتے ہوئے بی جے پی نے ان کی سیاسی وراثت ختم کرنے کی انتخابی حکمت عملی بنائی ہے۔اس سے پہلے کانگریس کے سینئر لیڈر سشیل کمار شندے نے این سی پی کے ساتھ انضمام کے سوال پر کہا تھا کہ ان کی پارٹی اور این سی پی مستقبل میں ایک ساتھ آئے گی۔بتا دیں کہ سونیا گاندھی کے ساتھ اختلافات کے بعد پوار نے 1999 میں کانگریس چھوڑ کراین سی پی کا قیام کیا تھا۔

کانگریس اور این سی پی پر نشانہ لگاتے ہوئے پاٹل نے کہاکہ کانگریس این سی پی نے کوتھرڈ حلقہ سے میرے خلاف ایک مضبوط امیدوار اتارنے کا منصوبہ بنایا تھا لیکن سچ یہ ہے کہ وہ اپنی پارٹی میں ایک بھی ایسا امیدوار نہیں ڈھونڈ پائے،میں کوتھرڈ سے آسانی سے جیت جاؤں گا۔کوتھرڈ میں پاٹل کا مقابلہ مہاراشٹر نونرمان سینا (ایم این ایس) کے کشور شندے سے ہے۔این سی پی نے شندے کو اپنی حمایت دی ہے۔مہاراشٹر میں 21 اکتوبر کو اسمبلی انتخابات ہونے ہیں اور 24 اکتوبر کو ووٹوں کی گنتی ہوگی۔