میسورو،26؍نومبر (ایس او نیوز) یہاں میسورو تعلقہ کے ادبور میں مختلف ترقیاتی کاموں کی سنگ بنیاد تقریب میں شرکت کرنے کے بعد نامہ نگاروں سے بات کرتے ہوئے میسور کے حلقہ چامنڈیشوری کے جنتا دل (یس) رکن اسمبلی جی ٹی دیوے گوڑا جنہوں نے کئی ماہ سے جنتا دل (ایس) سے دوری بنائے رکھی ہے،بتایا کہ ریاستی اسمبلی کی موجودہ میعاد تک وہ بحیثیت جنتادل (ایس) رکن اسمبلی کے طور پر ہی وہ عوام کی خدمت انجام دیں گے، بعد میں حلقے کے ووٹروں سے بات چیت کر کے اگلے اقدام کے تعلق سے فیصلہ کریں گے۔ حلقہ چامنڈیشوری میں گزشتہ اسمبلی انتخابات میں جی ٹی دیوے گوڑا نے سابق وزیراعلیٰ و کانگریس کے سینئر قائد سدارامیا کو 35000سے زائد ووٹوں کے فرق سے شکست دی تھی۔ سابق وزیر اعلیٰ ایچ ڈی کمار سوامی کی قیادت والی کانگریس اور جنتا دل (ایس) کی مخلوط حکومت میں دیوے گوڑا نے جس قلمدان کی خواہش کا اظہار کیا تھا نہ دینے کے بعد انہوں نے جنتا دل (ا یس) کے قائدین سے دوری اختیار کرلی تھی۔ جی ٹی دیوے گوڑا نے مزید بتایا کہ وہ جنتا دل (ایس) سے مستعفی نہیں ہوں گے بلکہ آئندہ انتخابات کے موقع پر حالات کا جائزہ لے کرحتمی فیصلہ کریں گے۔ حلقہ چامنڈیشوری کے ووٹران سے صلاح و مشورہ کے بغیر میں کوئی فیصلہ نہیں کرونگا، شری جی ٹی دیوے گوڈا نے بتایا۔اس موقع پر انہوں نے مزید بتایا کہ گرام پنچایت کے انتخابات کے موقع پر سیاسی پارٹیوں کو اپنی پسند کے امیدواروں کو میدان میں نہیں اتارنا چاہئے بلکہ عوام کو اپنی پسند کے امیدواروں کو منتخب کرنا چاہئے۔ اس لئے میں ووٹران سے اپیل کروں گا کہ ایسے امیدوار کو ووٹ دیں جوعوام کی صحیح ڈھنگ سے خدمات کرتا ہو۔ پنشن دلانے میں، پاکی وصفائی کا خاص خیال رکھنے میں اور عوام کی شکایات پر کام کرنے کے لئے بغیر وقت ضائع کئے کام کرتا ہو۔ اس لئے سیاسی پارٹیوں کو چاہئے وہ گرام پنچایت انتخابات کے موقع پر مداخلت نہ کریں بلکہ عوام کو اپنی پسند کے امیدواروں کو منتخب کرنے کے لئے آزادی دینی چاہئے۔