بھٹکل:26؍جون(ایس اؤ نیوز)بھٹکل فاریسٹ علاقے میں جنگلی جانوروں کا شکار کرنے کے الزام میں  فاریسٹ محکمہ کے افسران  نے 15افراد کے خلاف ایف آئی آر داخل کرتے ہوئے 11ملزموں کو گرفتار کرکے عدالت میں پیش کیا ہے۔

محکمہ فوریسٹ کے ایک آفسر نے بتایا  کہ بھٹکل زون ، بھٹکل شاخ حدود کے ساگر روڈ پر واقع کچرا نکاسی مرکز سےمتصل بیللکھنڈ فاریسٹ علاقہ سروے نمبر 61پر پڑوسی ضلع شیموگہ کے شکاری پور تعلقہ کے 15لوگ جنگلی جانوروں کا شکار کررہے تھے ۔اس دوران  فاریسٹ آفیسر ان کو مصدقہ ذرائع سے  واردات کی خبر موصول ہوئی جس  پر کارروائی کرتے ہوئے 2جنگلی سور اور ایک ٹاٹاایس سواری کو  ضبط کرلیا گیا  اورشکار کھیلنے آئے  15افراد میں سے 11ملزموں کو گرفتارکرنےمیں کامیابی حاصل کی ۔

 گرفتار شدہ ملزموں کو عدالت میں پیش کیاگیاتو انہیں عدالتی تحویل میں بھیج دیاگیا ہے۔ ملزموں کی شناخت شیموگہ ضلع شکاری پور تعلقہ کے پرشورام ، چندرپا بنگارپا ،رمیش بالپا ،بنگاری چندرپا ، سوری چندرپا، ہنومنت گولیپا، اشوک رامپا ، ناگراج بسونتپا، چندرپا بنگارپا، کمار یلپا، ہنومنت رمیش نائک، یووراج ، سبھاش، ناگپا، یلپا کی حیثیت سے کی گئی ہے ۔   4مفرور ملزموں کی تلاش کے لئے پولس نے  جال بچھایا ہے اور عنقریب اُن کی بھی گرفتاری کا یقین دلایا ہے۔

 ڈی ایف اوگنپتی اور اے سی ایف بال چندر کی رہنمائی میں بھٹکل زون فاریسٹ آفیسر شنکر گوڈا ، زونل آفیسر روی ایس، ملیکارجن، گنپتی نائک، راما نائک، پرمود ، شیوانند، میگھ راج سمیت دیگر  عملہ کارروائی میں شریک تھا۔