کنداپور9/جنوری (ایس او نیوز) کولورسے اڈپی جانے والی ایک نجی بس میں سفر کررہے میاں اور بیوی نے چلتی بس میں زہر کھالیا جس کے بعد ان کی حالت بہت ہی سنگین ہوگئی۔ جبکہ ان کا ڈیڑھ سالہ بچہ بے یار ومددگار ہوگیا ہے۔

 بتایا جاتا ہے کہ زہر کھاکر خودکشی کی کوشش کرنے والے مردکا نام راجکمار (35سال) ہے اور اس کی بیوی کا نام سنگیتا (28سال) ہے۔ ان دونوں نے کولور مندر میں پوجاپاٹ کی تھی اور اڈپی جانے والی بس میں سوار ہوگئے تھے۔ ان کے ساتھ ان کا ڈیڑھ سال کا بچہ بھی تھا۔وہ دونوں تمل ناڈو کے باشندے ہیں  مگر اڈپی میں امبلپاڈی کے قریب واقع خیموں میں رہتے ہیں۔ جب سفر جاری تھا تو دونوں نے خودکشی کے ارادے سے بس میں ہی زہر  کھالیا۔ ان کی حالت بگڑتے ہی بس ڈرائیور، کنڈکٹر اور دوسرے مسافرپہلے انہیں کنداپور کے سرکاری اسپتال لے گئے پھر وہاں سے اڈپی کے ڈسٹرکٹ اسپتال میں منتقل کروایا جہاں ان کی حالت بہت ہی نازک بتائی جاتی ہے۔اس دوران بس کے دوسرے مسافروں نے معصوم بچے کی دیکھ بھال کی۔