بھٹکل 20جولائی (ایس او نیوز) ضلع اُترکنڑا کے سداپور میں سنیچر شب کو ہوئے ایک بیوہ کے قتل میں پولس نے ایک شخص کو گرفتار کرلیا ہے جس کی شناخت سداپور ڈوڈمنے پنچایت حدود کے رہنے والے راجو تمّا گوڈا کی حیثیت سے کی گئی ہے۔ پولس اس بات کا پتہ لگارہی ہے کہ کیا راجو اس بیوہ خاتون کی عصمت دری کرنے اس کے گھر گیا تھا اور خاتون کے مزاحمت کرنے پر اس کا قتل کیا یا پھر چوری کرنے کی نیت سے اس کے گھر پر گیا تھا۔
ذرائع سے ملی اطلاع کے مطابق اتوار صبح اس قتل کا پتہ اُس وقت چلا جب الیکٹری سٹی کا بل دینے ایک شخص اس کے گھر پہنچا تو دیکھا کہ گھر کے باہری کمرے میں ہی خاتون کی نعش خون میں لت پت پڑی ہوئی ہے، اس نے فوراً مقامی لوگوں کو واقعے کی جانکاری دی جس کے بعد سداپور پولس جائے وقوع پر پہنچی۔ بتایا گیا ہے کہ اس خاتون کا قتل سنیچر رات کو کیا گیا ہوگا۔ ذرائع کی مانیں تو ٓ خاتون کی نعش کے کپڑے اس انداز میں بکھرے پڑے تھے جیسے اس کی عصمت دری کی کوشش کی گئی ہو۔
مہلوک خاتون کی شناخت گوری ایشور نائک (50) کی حیثیت سے کی گئی ہے۔ بتایا گیا ہے کہ اس کے شوہر کا گذشتہ سال ہی انتقال ہوا تھا، اس کا ایک بیٹا کام کے سلسلے میں تیرتاہلّی گیا ہوا تھا جبکہ اس کی ایک بیٹی کی شادی ہونے کےبعد وہ اپنے سسرال ہوسور میں رہتی ہے، اس بنا پر گھر پر بیوہ خاتون اکیلی تھی۔
آج پیر کو سداپور پولس خاتون کے قتل کے الزام میں راجو تماّ گوڈا نامی شخص کو گرفتار کرنے میں کامیاب ہوگئی ہے۔ پولس مزید جانکاری جٹانے میں لگی ہوئی ہے اور چھان بین جاری ہے۔