بھٹکل 6/ اپریل (ایس او نیوز) کورونا وائرس نے جہاں ایک طرف دنیا بھر میں اپنا قہر برپا کیا ہے، وہیں دوسری طرف ڈاکٹر، طبی عملہ اور سماجی رضاکا ر اپنی جان پر کھیلتے ہوئے اس وباء کو قابو میں کرنے کی مہم چلارہے ہیں۔ ایسے میں فیلڈ میں رہ کر کام کرنے والوں کا تحفظ بہت ہی اہم ہوجاتا ہے، جس کے لئے ضروری سازوسامان یا پرسنل پروٹیکٹیو اکوِپمنٹ وغیرہ کی کمی کھل کر سامنے آگئی ہے۔مضافات میں کام کررہے ڈاکٹروں کے پاس ضروری ماسک تک موجو د نہیں ہیں اور اس کی وجہ سے کورونا وباء پر قابو پانے میں مشکلات پیش آرہی ہیں۔ان حالات میں بہت سارے اداروں کی طرف سے دوسرے شہروں میں خرید کر اور خواتین کی طرف سے گھروں پر ماسک تیار کرکے طبی عملہ اور رضاکاروں کو فرا ہم کیے جارہے ہیں۔ 

 لیکن اب بھٹکل کے ’میکرس ہَب‘ نامی نوجوانوں کے ایک گروپ نے طبی عملے کے لئے ضروری نقاب (فیس شیلڈ) تیار کرلی ہے، جو ماسک سے بڑھ کر طبی عملے کا تحفظ کرنے کے کام آسکتی ہے۔ اس لئے اس کی ستائش ہر طرف سے کی جارہی ہے۔کیونکہ یہ شیلڈ سرکاری سطح پر بھی دستیاب نہیں ہے۔بھٹکل مدینہ کالونی کے سید قطب ہال میں واقع ’میکرس ہَب‘ نوجوان طلبہ کا ایک گروپ ہے جس نے اپنی جدت طرازی اور صلاحیت کا مظاہرہ کرتے ہوئے یہ ’فیس شیلڈ‘ یا نقاب تیار کرلی ہے۔ اور اس کا مقصدکورونا وائرس کا مقابلہ کرنے کے لئے طبی عملہ، پولیس اہلکار اور رضاکاروں کو ضروری تحفظ فراہم کرنا ہے۔

 فیس شیلڈ سے متعلق بات کرتے ہوئے نُوہیل دامودی نے بتایا کہ طبی عملہ جو ماسک استعمال کرتا ہے وہ صرف ناک اور منھ کو محفوظ رکھتا ہے، لیکن آنکھوں کے لئے خطرہ موجود رہتا ہے۔لیکن اب ہم نے جو شیلڈ تیار کی ہے وہ پورے چہرے کو محفوظ رکھنے کا کام کرتا ہے۔اس سے طبی عملے کے ساتھ دوسرے جولوگ بھی اس میدان میں کام کررہے ہیں ان کے لئے یہ نقاب بہت ہی مفید ہوسکتی ہے۔

 انہوں نے بتایا کہ فی الحال میکرس ہب والے اس نقاب کو اپنے ہاتھوں سے تیار کررہے ہیں اس لئے پہلے مرحلے میں 100 شیلڈس تیار کرنے کا منصوبہ بنایا گیا ہے۔ بھٹکل تعلقہ میں کوروناوائرس کی روک تھام کے لئے طبی شعبے کے نوڈل آفیسر ڈاکٹر شرد نائک نے ہمیں شیلڈ تیار کرنے کی اجازت دی ہے۔ آئندہ اس کی تیاری کے لئے ضروری مشین کا انتظام کرنے کے بعد ایک دن میں 500سے زیادہ شیلڈس تیارکی جاسکیں گی۔

 خیال رہے کہ انجینئرنگ کالج میں زیر تعلیم طلبہ کے اس گرو پ نے 2017میں ’میکرس ہب‘ قائم کیاتھا۔اس ادارے کے تحت انجینئرنگ اور پالی ٹیکنیک شعبوں میں زیر تعلیم طلبہ کے لئے پروجیکٹس کی تیاری میں مدد کرنااور ان کی رہنمائی کرنا، نوجوانوں کو انجینئرنگ میں دلچسپی لینے پر آمادہ کرنے کے لئے ورکشاپ منعقد کرنا، میکرس ہب کے مقاصد میں شامل ہے۔