مودی، امیت شاہ اور بی جے پی کے خلاف کارروائی کیوں نہیں؟:کانگریس
نئی دہلی،17؍اپریل (ایس او نیوز؍ایجنسی) کانگریس کا وفد آج پھر ایک بار الیکشن کمیشن پہنچا اور کچھ مسائل کو لے کر کمیشن سے شکایت کی۔ کانگریس کی طرف سے سینئر لیڈرابھیشیک منو سنگھوی نے اطلاع دی کہ پانچ مسائل کو لے کر کانگریس نے الیکشن کمیشن سے شکایت کی ہے۔ابھیشیک منو سنگھوی نے کہا کہ جو پانچ مسئلے اٹھائے گئے ان پر کمیشن نے یقین دلایا کہ کچھ مسائل پر کارروائیاں چل رہی ہیں، باقی معاملات میں بھی کارروائی ہوگی۔ابھیشیک منو سنگھوی نے بتایا کہ : 1:- ریلوے ٹکٹ پر وزیر اعظم مودی کی تصویر کی شکایت کی گئی ہے۔کمیشن نے اس پرکارروائی شروع کر دی ہے۔ 2:- کرناٹک میں وزیر اعظم کے ہیلی کاپٹر سے اتارے گئے مبینہ پراسرار صندوقوں کی شکایت کی گئی۔3:- وزیر اعظم مودی، امت شاہ، یوگی آدتیہ ناتھ کے بیانات کی شکایت کی تھی۔ اس کے بعد کمیشن نے سخت کارروائی کی، لیکن امت شاہ اور وزیر اعظم پر کوئی کارروائی نہیں ہوئی۔ مانگ کی گئی کہ ان پر بھی کارروائی ہو کیونکہ ان کے بیانات سے ضابطہ اخلاق کی خلاف ورزی ہوئی ہے۔ 4:- کرور کے کانگریس امیدوار نے شکایت کی کہ مقامی انتظامیہ کی طرف سے انہیں انتخابی تشہیر نہیں کرنے دی جارہی ے۔ اس کی جانچ کی مانگ کی گئی۔ 5:- راہل گاندھی پر ہماچل پردیش کے بی جے پی کے لیڈر ستبیر کے بیان کی شکایت کی۔ستبیر پر پابندی کا مطالبہ کیا گیا۔اس کے علاوہ ابھیشیک منو سنگھوی سے جب پوچھا گیا کہ نوجوت سنگھ سدھو کے بیان پران کا کیا کہنا ہے تو انہوں نے کہا کہ بیان نہیں سنا لیکن جیسا بتایا جا رہا ہے ان میں کچھ بھی قابل اعتراض نہیں ہے۔ اگر کچھ غلط ہو گاتوالیکشن کمیشن نوٹس لے گا۔
