نئی دہلی، 24؍جولائی(ایس او نیوز؍ایجنسی)ورلڈ ہیلتھ آرگنائزیشن (ڈبلیو ایچ او)نے منکی پوکس کو عالمی ہیلتھ ایمرجنسی قرار دے دیا ہے۔ ڈبلیو ایچ او نے یہ فیصلہ میٹنگ میں طویل بحث کے بعد کیا ہے۔ منکی پوکس اب تک 80ممالک میں پھیل چکا ہے۔ ہندوستان میں اب تک اس وائرس کے 3کیس رپورٹ ہوئے ہیں۔دوسری جانب امریکہ میں پہلی بار دو بچوں میں یہ انفیکشن پایا گیا ہے۔ صحت کے ادارے سینٹرز فار ڈیزیز کنٹرول اینڈ پری ونشن(سی ڈی سی)کے مطابق ایک بچے کا تعلق کیلیفورنیا سے ہے جب کہ دوسرا بچہ نومولود ہے اور وہ امریکہ کا رہائشی نہیں ہے۔ محکمہ صحت کے حکام کا کہنا ہے کہ دونوں بچوں کی حالت مستحکم ہے۔ علاج کیلئے اسے اینٹی وائرل دوادی گئی ہے۔ سی ڈی سی کے مطابق، یہ دوا 8 سال سے کم عمر کے بچوں کو دی جانی چاہیے کیونکہ ان میں سنگین انفیکشن کا خطرہ ہوتا ہے۔ Monkeypoxmeter.com کے اعداد و شمار کے مطابق ہندوستان سمیت 79 ممالک میں 16,886 مریضوں کی تصدیق ہوئی ہے۔ ان میں سے یورپ میں سب سے زیادہ 11,985 /افراد ہیں جو منکی پاکس سے متاثر ہوئے ہیں۔ اس کے ساتھ ہی اس بیماری سے متاثر ہونے والے سرفہرست 10 ممالک میں برطانیہ، اسپین، امریکہ، جرمنی، فرانس، پرتگال، کینیڈا، ہالینڈ، اٹلی اوربلجیم شامل ہیں۔ منکی پوکس نے اس سال تین افراد کی جان لے لی ہے۔