شمالی کینرا کے لوگوں کو اس صورت حال سے کب نجات ملے گی؟- مریضوں کو اسپتال پہنچانے کے لئے بھی سڑک کی سہولت نہیں !
انکولہ 5 / مارچ (ایس او نیوز) شمالی کینرا کے دوردراز علاقوں میں اب بھی کچھ چھوٹے دیہات ایسے ہیں جہاں پر آنے جانے کے لئے مناسب سڑک اور راستہ موجود نہیں ہے۔ یہاں کے حالات اتنے بد تر ہیں کہ کسی مریض کو ایمرجنسی طور پر اسپتال لے جانا ہوتو موٹر گاڑی یا ایمبولینس کے بارے میں سوچا بھی نہیں جا سکتا۔ بلکہ ایک بڑے سے مضبوط ڈنڈے سے جھولی یا کرسی باندھنے کے بعد مریض کو اس میں بٹھا کر جنگلوں کے درمیان سے پہاڑی راستے سے ہوتے ہوئے کاندھوں پر اٹھا کر شہر میں لانا پڑتا ہے۔
دو دن قبل انکولہ کے وینبیل گرام سے 70سالہ نورا پوکا گوڈا کو اسی طرح اٹھا کر لانا پڑا کیونکہ اس پر فالج کا حملہ ہوا تھا اور وہ چلنے پھرنے کے قابل نہیں تھا۔ اس مریض کو علاج کے لئےمنگلورو لے جانا تھا، لیکن دیہات سے نیشنل ہائی وے تک آنے کے لئے دوسرا کوئی چارہ نہیں تھا۔ اس لئے گھر والوں اسے کرسی میں بٹھا کر رسی سے باندھتے ہوئے کاندھوں پر اٹھا کر ہائی وے تک لانے کے لئے مجبور ہوگئے۔ پھر وہاں سے کار کے ذریعے منگلورو لے جایا گیا۔
شاندار ترقی، اسمارٹ سٹی اور سوپر ایکسپریس ہائی ویز تعمیر کرنے کی دوڑ میں لگے ہوئے اس ملک کی یہ دوسری تصویر انتہائی درد انگیز اور تعجب خیز ہے۔ عوام کا کہنا ہے کہ ایسی ہی صورت حال شمالی کینرا کے دیگر علاقوں میں بھی پائی جاتی ہے۔ وہ پوچھتے ہیں کہ ایسے دشوار کن حالات سے دیہی عوام کو آخر کب نجات ملے گی؟
