واٹس ایپ کی نئی پرائیویسی پالیسی 3 ماہ کے لئے ملتوی، اکاؤنٹ 8 فروری کے بعد بھی جاری رہے گا
نئی دہلی،17؍جنوری (آئی این ایس انڈیا) واٹس ایپ نے حال ہی میں اپنی پرائیویسی پالیسی کو اپ ڈیٹ کرکے لوگوں کو اسے اکسیپٹ (قبول)کرنے کے لئے 8 فروری کی ڈیڈ لائن دی تھی، ایکسیپٹ نہ کرنے کی صورت میں صارفین کو اپنا اکاؤنٹ حذف کرنا ہوتا۔ اس نئی کنڈیشن پر واٹس ایپ کی دنیا بھر میں خوب تنقید کی گئی۔ اس دوران واٹس ایپ نے کم سے کم تین ماہ کے لئے اس شرط کو ملتوی کردیا ہے۔ یعنی 8 فروری کو کوئی بھی اکاؤنٹ حذف نہیں ہوگا۔
وہاٹس ایپ نے ٹویٹس کے ذریعے کہا ہے کہ نئی پالیسی سے متعلق کسی بھی طرحکی پریشانی کو دور کرنے کے لئے وہ واٹس ایپ صارفین سے براہ راست بات کرنے کی کوشش کر رہے ہیں۔ 8 فروری کو کوئی بھی اکاؤنٹ معطل یا حذف نہیں ہوگا۔ ہم مئی تک اپنا بزنس پلان واپس لے لیتے ہیں۔ ہم اس بات کو یقینی بنائیں گے کہ صارفین کو نئی پالیسی کو سمجھنے اور اس پر نظرثانی کرنے کے لئے کافی وقت ملے گا۔ اسی کے ساتھ ہی واٹس ایپ نے یہ بھی لکھا ہے کہ صارفین کو نرمی دی جانی چاہئے۔ ہم نے کبھی بھی کسی بھی اکاؤنٹ کو اس کی بنیاد پر حذف کرنے کا منصوبہ نہیں بنایا ہے اور آئندہ بھی ایسا نہیں کریں گے۔
واضح رہے کہ واٹس ایپ نے ایک بلاگ جاری کرکے اس میں تفصیل سے لکھا ہے۔ کمپنی نے بلاگ میں لکھا ہے کہ ہمیں بہت سے لوگوں کی رائے موصول ہوئی ہے کہ ہماری پرائیویسی پالیسی کے اپ ڈیٹ کو مکمل طور پر سمجھنا آسان نہیں ہے۔ سچ تو یہ ہے غلط معلومات بھی پھیل رہی ہے اس لیے ہم چاہتے ہیں کہ آپ ہمارے کرنے کے طریقے کو سمجھیں اور ساتھ ہی اصولوں اور حقائق کو بھی سمجھیں ۔