ویسٹرن رینج انسپکٹر جنرل آف پولس کا بھٹکل میں جامع مسجد سمیت تاریخی مقامات کا دورہ
بھٹکل 15/ڈسمبر (ایس او نیوز) ویسٹرن رینج انسپکٹر جنرل آف پولس(آئی جی پی) ارون چکرورتی نے آج سنیچر کو بھٹکل میں ہاڈولی مندر، جامع مسجد، مونی بسدی اور پرانا تاریخی مکان برنی گھرکا دورہ کیا اور ذمہ داران سے مل کر متعلقہ مقامات کی مکمل جانکاری حاصل کی۔ انہوں نے بتایا کہ بھٹکل کی تاریخ کافی پرانی ہے اور انہوں نے کتابوں میں بھٹکل کے تعلق سے کافی کچھ پڑھا ہے، انہوں نے بتایا کہ عرب کلچر ،جین کلچر اور بھٹکل میں شیر میسور ٹیپو سلطان کی مسجد وغیرہ کے متعلق کافی معلومات کتابوں کے ذریعے حاصل کی ہیں، مگر متعلقہ مقامات کا خود جاکر جائزہ لینا چاہتا تھا، اسی مقصد کے تحت آج بھٹکل میں ان علاقوں کا دورہ کیا ہوں۔
جامع مسجد میں ان کی آمد کے موقع پر جماعت المسلمین کے صدر جناب ایس پی شفیع، جنرل سکریٹری مولوی طلحہ رکن الدین ندوی، سکریٹری اول جناب ایس ایم عبدالعظیم، نائب قاضی مولانا عبدالرب ندوی، نائب صدر دوم جناب ایس جے سید ہاشم، سابق صدر جناب جان عبدالرحمن محتشم ودیگر کافی لوگ موجود تھے۔
آئی جی پی کو مسجد کے تعلق سے پرانے ریکارڈس دکھائے گئے جس کے مطابق جامع مسجد 850 ہجری میں تعمیر ہوئی تھی، مسجد کے ایک مینار کے اوپر چونکہ سونے کا کلس لگا ہوا ہے، اس لئے یہ مسجد چِنن پلّی (یعنی سونے کی مسجد) کے نام سے معروف ہے۔
آئی جی پی کے ہمراہ ضلع اُتر کنڑا کے ایس پی مسٹر ونائک پاٹل، بھٹکل ڈی وائی ایس پی مسٹر ویلنٹائن ڈیسوزا، بھٹکل سرکل پولس انسپکٹر گنیش سمیت کافی دیگر پولس اہلکار موجود تھے۔ بتایا گیا ہے کہ آئی جی پی آرون چکرورتی ہوناور کا دورہ کرنے کے بعد بھٹکل پہنچے تھے، متعلقہ علاقوں کا دورہ کرنے کے بعد مینگلور کے لئے روانہ ہوگئے۔