کنداپور5اپریل (ایس او نیوز) آسٹریلیا سے ملنے والی خبر کے مطابق گولڈ کوسٹ میں منعقدہ کامن ویلتھ گیمز میں کنداپور کے گروراج نے ویٹ لفٹنگ میں سلور میڈل حاصل کرتے ہوئے ہندوستان کے لئے پہلا میڈل حاصل کیا ہے۔
اطلاع کے مطابق۲۵سالہ نوجوان گروراج نے 56کیلوگرام کے زمرے میں دوسرے مقام پر رہتے ہوئے سلور میڈل پایا جبکہ تین مرتبہ میڈلسٹ رہے ملیشیاء کے محمداظہار احمد نے اس بار بھی پہلے مقام پر اپنا قبضہ برقرار رکھا اورگولڈمیڈل حاصل کیا۔سری لنکا کے لاکھ مل چاتورنگا نے تیسرا مقام پایا۔
سلور میڈلسٹ گروراج کے بارے میں بتایا جاتا ہے کہ وہ ایک ٹرک ڈرائیور مہابلا پجاری کا بیٹا ہے اور اپنے شوق و محنت اور بہترین کوچ کی نگرانی میں پہلوانی سیکھنے کا خواب پورا کیا ہے۔فی الحال وہ انڈین ایئر فورس میں خدمات انجام دے رہا ہے۔وہ کُشتی کے علاوہ ویٹ لفٹنگ میں بھی مہارت حاصل کرنے کے لئے سرگرم رہا ہے ۔ اس سے قبل اس نے ایشیئنز گیمس میں 56کیلوگرام کے زمرے میں 241کیلوگرام کا وزن اٹھا کرگولڈ میڈل حاصل کیا تھا۔ساؤتھ ایشینز گیمز انٹرنیشنل ویٹ لفٹنگ میں بھی اس نے ایک گولڈ میڈل جیتاہے۔ اس مرتبہ کامن ویلتھ گیمزمیں اس نے اسی زمرے میں اپنا ریکارڈ بہتر کرتے ہوئے 249کیلو گرام کا وزن اٹھاتے ہوئے سلور میڈل جیتاہے۔