بنگلورو:23؍نومبر(ایس اؤ نیوز) دسمبر میں کوئی اسکول یا کالج  نہیں کھلیں گے اور اول سے ہشتم جماعت تک کی شروعات کے متعلق ہم نے سوچا ہی نہیں ہے یہ بات  ریاستی وزیر تعلیمات برائے پرائمری اور سکینڈری ایس سریش کمار نے بتائی۔

کورونا وائرس کی وجہ سے گزشتہ 8مہینوں سے اسکول اور کالج بند ہیں، انہیں دوبارہ کھولنے کے متعلق وزیر اعلیٰ بی ایس یڈیورپا کی صدارت میں محکمہ تعلیمات عامہ سمیت مختلف محکمہ جات کے ساتھ منعقدہ میٹنگ میں یہ متفقہ فیصلہ لیاگیا ہے۔

میٹنگ کے بعد اخبارنویسوں سے گفتگو کرتے ہوئے وزیر تعلیم سریش کمار نے بتایا کہ ماہرین کی کمیٹی نے صلاح دی ہے کہ دسمبر کے آخر تک کالج اور اسکولوں کو نہ کھولیں۔ اسی بنیاد پر  بچوں کی حفاظت کو مد نظر رکھتے ہوئے  اس طرح کا  فیصلہ کیا گیا ہے۔ میٹنگ میں ماہرین کی طرف سے پیش کی گئی رپورٹ پر وزیر اعلیٰ اور وزیر صحت کی موجود گی میں سوچ بچار کیاگیا۔ چونکہ موسم سرما شروع ہونے جارہا ہے اس لئے فیصلہ لیا گیا کہ اسکولوں کی شروعات  کرنا مناسب نہیں ہے۔انہوں نے بتایا کہ  ڈاکٹر سدرشن کی قیادت والی ماہرین کی کمیٹی کے ساتھ دسمبر کے تیسرے ہفتہ میں پھر  دوبارہ میٹنگ ہوگی اور  حالات کا جائزہ لینے  کے بعد اسکول اور کالجوں کی شروعات کے متعلق کوئی حتمی فیصلہ لیا جائے گا۔

سریش کمار نے بتایا کہ  اسکول اور کالج شروع نہ  ہونے کے نتیجے میں بچہ مزدوری میں اضافہ ہورہاہے، چند تعلقہ جات میں بچہ شادی  میں اضافہ ہونے کے متعلق بھی میٹنگ میں بحث  ہوئی ۔ اسی طرح جن اضلاع میں کورونا وائر س بہت کم ہے وہاں کے اسکول  اور کالج کو کھولنے کے متعلق بھی میٹنگ میں بات ہوئی ۔ خاص کر بنگلورو، میسور، منگلورو کے سوا دیگر مقامات پر اسکولوں کو شروع کئے جانے کے متعلق غور کیاگیا ، مگر محکمہ صحت عامہ کی رائے کا احترام کرتے ہوئے  دسمبر کے آخر تک ریاست  میں اسکولوں اور کالجوں کو شروع نہ کئے جانے کا فیصلہ لیا گیا۔