جموں و کشمیر کو ریاست کا درجہ ہم دیں گے: ملکارجن کھرگے
سری نگر،30؍جنوری (ایس او نیوز؍ایجنسی) شدید برف باری کے درمیان کانگریس صدر ملکارجن کھرگے نے بھارت جوڑو یاترا کی اختتامی تقریب سے خطاب کرنے سے پہلے کانگریس کے سابق صدر راہل گاندھی کا یاترا کامیابی سے مکمل کرنے پر شکریہ ادا کیا اور ان کا استقبال چادر پیش کر کے کیا۔ ان کی تقریر کے بعد راہل گاندھی نے بھی کھرگے کو چادر پیش کی۔
برف باری کا ذکر کرتے ہوئے کھرگے نے کہا کہ ان کے لئے برف باری دیکھنا ایک نیا تجربہ ہے کیونکہ انہوں نے ایسا کبھی نہیں دیکھا، یہ ایک نیا ماحول ہے۔ انہوں نے اپنے خطاب میں بتایا کہ جب راہل گاندھی نے یاترا پر جانے کا فیصلہ لیا تو انہیں گھبراہٹ ہوئی۔ انہوں نے کہا کہ کانگریس رہنماؤں کے دماغ میں یہ سوال آیا کہ کیسے ہوگا؟ یاترا کے کامیاب اختتام پر انہوں نے یاترا سے متعلق اپنے تحفظات پر ایک شعر بھی پڑھا۔
ڈر مجھے بھی لگا فاصلہ دیکھ کر
پر میں بڑھتا گیا راستہ دیکھ کر
خود بخود قریب آتی گئی
میری منزل میرا حوصلہ دیکھ کر
کھرگے نے کشمیریوں کے حوصلہ کی تعریف کرتے ہوئے کہا کہ ’’کشمیر میں جو دو چار دن میں حوصلہ دیکھا، اس سے یہ لگا کہ کشمیر کے لوگ سب سے زیادہ دل والے ہیں۔‘‘ انہوں نے کہا کہ یہ یاترا انتخابات جیتنے کے لئے نہیں ہے، نہ ہی کانگریس کو آگے بڑھانے کے لئے ہے، بلکہ یہ نفرت سے لڑنے کے لئے ہے۔ کھڑگے نے اپنے خطاب میں کہا کہ یاترا کے دوران راہل گاندھی نے سب سے ملنے کی کوشش کی اور انہوں نے سب کچھ زمین پر خود دیکھا اور وزیر اعظم کی طرح سب کچھ ہوا میں نہیں دیکھا۔
کھرگے نے کہا کہ راہل گاندھی نے یہ ثابت کر دیا ہے کہ انہوں نے یاترا کے ذریعہ کنیاکماری سے کشمیر تک ملک کو جوڑنے کی کوشش کی ہے۔ انہوں نے بی جے پی پر حملہ کرتے ہوئے کہا کہ ان کے دور میں چند لوگوں کی جائیداد بڑھ رہی ہے اور اکثریت پریشان ہے۔ اپنے خطاب میں کشمیریوں سے انہوں نے کھل کر کہا کہ کانگریس کشمیر کو ریاست کا درجہ دلائے گی اور وہ یہاں اسمبلی بنائے گی۔ انہوں نے لوگوں سے کہا کہ وہ نفرت کے بازار میں محبت کی دکانیں کھولیں۔