کرناٹک: فلورٹیسٹ کے لیے یدی یورپا بھی تیار،کہا، باغی اراکین اسمبلی کے رابطے میں ہوں
بنگلور/ نئی دہلی، 13 جولائی(ایس او نیوز/آئی این ایس انڈیا) کرناٹک میں جاری سیاسی ہلچل کے درمیان بی جے پی صدر یدی یورپا نے کہا ہے کہ وہ ایوان میں طاقت ٹیسٹ کے لئے تیار ہیں۔یدی یورپا نے کہا کہ اگر حکومت اعتماد لانا چاہتی ہے تو انہیں کوئی اعتراض نہیں ہے۔کرناٹک کے سابق وزیر اعلی نے بتایا کہ وہ پیر تک انتظار کریں گے۔انہوں نے کہا کہ پیر کو اسپیکر سے ملاقات کرکے پیر کو ہی اعتمادتجویز لانے کو کہیں گے۔بتا دیں کہ کرناٹک کے وزیر اعلی ایچ ڈی کمارسوامی نے بھی کہا ہے کہ ان کی حکومت کو کوئی خطرہ نہیں ہے وہ اعتماد تجویزلائیں گے۔سابق وزیر اعلی یدی یورپا نے تسلیم کیا کہ وہ ممبئی میں موجود کانگریس کے باغی ممبران اسمبلی سے رابطے میں ہیں، وہ سب کے سب خوش ہیں۔یدی یورپا نے کہا کہ ایچ ڈی کمارسوامی کو فوری طور پر استعفیٰ دینا چاہئے اور نئی حکومت قائم ہونے دینا چاہئے، لوگ اس حکومت سے مایوس ہو چکے ہیں۔ادھر پانچ اور باغی ممبر اسمبلی سپریم کورٹ چلے گئے ہیں۔ان ممبران اسمبلی نے کورٹ سے شکایت کی ہے کہ اسپیکر کے آر رمیش کمار ان کا استعفیٰ قبول نہیں کر رہے ہیں۔ان ممبران اسمبلی کا کہنا ہے کہ اسپیکر کا رویہ ان کے آئینی اور بنیادی حقوق کی خلاف ورزی ہے۔اس دوران آزاد ممبر اسمبلی آر شنکر اور ایچ ناگیش نے اسپیکر کو ایک خط لکھ کر اپنے لئے اپوزیشن کی صفوں میں بیٹھنے کا مطالبہ کیا ہے۔یہ دونوں رکن اسمبلی کانگریس جے ڈی ایس حکومت کو حمایت کر رہے تھے، لیکن 8 جولائی کو انہوں نے حکومت سے حمایت واپس لے لی ہے۔