بھٹکل 29/اپریل (ایس او نیوز) امسال  نہ صرف بھٹکل بلکہ سرد سمجھے جانے والے  باغات کے  شہر بنگلور میں بھی  شدت کی گرمی سے لوگ پریشان ہیں  جس کے ساتھ ہی کئی علاقوں میں پینے کے پانی کا  مسئلہ بھی سنگین رُخ اختیار کرگیا ہے۔ ایک رپورٹ کے مطابق ریاست کرناٹک کے  26 اضلاع کے 2150 دیہاتوں میں  سوکھا پڑنے سے عوام پانی کے لئے ترس رہے ہیں۔

پانی کی شدید قلت کو دیکھتے ہوئے بھٹکل میں  ینگ اسٹار ویلفئیر اسوسی ایشن کی جانب سے  گذشتہ ایک ماہ سے  بھٹکل کے جامعہ آباد، نور محلہ، جالی روڈ اور محی الدین اسٹریٹ  سمیت اطراف کے علاقوں میں روزانہ 15 ہزار لیٹر پانی تقسیم کیا جارہا ہے۔ دیکھا گیا ہے کہ  ینگ اسٹار کی گاڑی پانی لے کر جیسے ہی متعلقہ علاقوں میں پہنچتی ہے، لوگ  گھروں میں موجود سبھی برتنوں کو  لے کر  پہلے سے ہی گھروں کے  باہر  گاڑی  کے انتظار میں رہتے ہیں۔

اخبارنویسوں سے گفتگو کرتے ہوئے ینگ اسٹار کے سماجی  شعبہ کے سکریٹری  سُہیل کداری نے بتایا کہ خدمت خلق کے جذبے کے تحت  فجر کی نماز کے فوری بعد سے لے کر شام پانچ بجے تک ہر روز قریب 200 گھروں کو پانی سپلائی کیا جارہا ہے اور یہ سلسلہ گذشتہ ایک ماہ سے جاری ہے۔  صرف مسلم ہی نہیں غیر مسلم گھروں کو بھی پانی دیاجارہا ہے۔ انہوں نے بتایا کہ  گذشتہ ایک ماہ سے شہر میں جس طرح کی گرمی  پڑی ہے، اوپری   علاقوں کے ساتھ ساتھ  نشیبی علاقوں میں بھی  کنویں سوکھ گئے ہیں، ایسے میں    لوگ  دور دراز علاقوں میں جاکر  پانی حاصل کرنے سے بھی قاصر ہیں۔ سُہیل کے مطابق  ہر گھر میں روزانہ جتنے پانی کی ضرورت  ہے ، مکمل مقدار میں اُنہیں پانی دیا جارہا ہے۔ سہیل کے ساتھ  ینگ اسٹار کے  عاکف گوائی، ظہیر شیخ،  مولانا رفیق،  مشعل ، مدثر اور دیگر نوجوان  پورا دن اسی  کام میں لگے ہوئے ہیں۔  متعلقہ علاقہ کے عوام   ینگ اسٹار اسوسی ایشن کی جانب سے پانی سپلائی کئے جانے پر اُن   کا  شکریہ ادا کرنے کے ساتھ ساتھ   کام  میں لگے  تمام لوگوں کے لئے  دعائیں بھی دے رہے ہیں۔

خیال رہے کہ  بھٹکل میں گرمی  اتنی بڑھ گئی ہے کہ  درجہ حرارت  34 ڈگری تک پہنچ چکا  ہے۔   شہر کے دوسرے علاقوں میں بھی پانی کی شدید قلت سے عوام پریشان ہیں۔  خبر ہے کہ کچھ نشیبی   علاقوں میں بعض دیگر  اداروں کی طرف سے بھی پانی  سپلائی کرنے کا کام شروع کیا گیا ہے۔