بھٹکل 16/ڈسمبر (ایس او نیوز) موسم بھلے  کوئی  بھی ہو، پانی پیاس کو بجھانے میں بہترین کردار ادا کرتا ہے۔ بچوں کی صحت اور اُن کی نشونما کے لئے بھی پانی بے حد ضروری ہے۔ ماہرین کی مانیں تو بچوں کو کئی بیماریوں سے دور رکھنے کےلئے مناسب مقدار میں وقفے وقفے سے پانی پینا   ضروری ہے،  مگر بچے جب صبح سے شام تک اسکول میں رہتے ہوں  تو  ظاہر بات ہے کہ اُن کو مناسب مقدار میں  پانی پینے  کا موقع   نہیں ملتا، لیکن اب پہل کرتے ہوئے انجمن آزاد  پرائمری اسکول نے  بچوں کو پانی پینے کےلئے وقفے وقفے سے گھنٹی بجاکر  موقع فراہم کرنے کا فیصلہ کیا ہے۔

انجمن آزاد اسکول کی ہیڈ مسٹریس محترمہ شمیم چامنڈی نےبتایا کہ گذشتہ دس دنوں سے  اسکول میں بچوں کےلئے  پانی  کی گھنٹی بجانے کا سلسلہ شروع کیا جاچکا ہے۔  صبح 9:50،  11:10،  12:50 اور دوپہر 2:10 کو  گھنٹی بجائی جارہی ہے  اور پانی پینے کےلئے بچوں کو دو سے تین منٹ کا وقفہ دیا جارہا ہے۔ انہوں نے بتایا کہ پانی بڑوں کی طرح بچوں کی صحت کےلئے بھی ضروری ہے، مناسب مقدار میں پانی نہ پینے سے انسان بیماریوں کا شکار ہوسکتا   ہے، انہوں نے بچوں کے والدین سے درخواست کی کہ وہ پانی سے بھری بوتل کے ساتھ بچوں کو اسکول روانہ کریں۔ انہوں نے  کہا کہ دن میں پانی کی گھنٹی بجنے کے بعد تمام بچوں کو مناسب مقدار میں پانی پینے کی ہدایت دی جاتی ہے اور بچے  دئے گئے وقفے میں پانی پینے میں خوشی محسوس کرتے ہیں۔

خیال رہے کہ اسکولوں میں پانی کی گھنٹی  بجانے کی پہل  پڑوسی ریاست کیرالہ نے کی تھی، جس کے بعد کرناٹک کے وزیرتعلیم سُریش کمارنے بچوں کی صحت کے لئے اسے صحیح قدم  قرار دیتے ہوئے  گذشتہ ماہ نومبر میں  ریاست کے پبلک انسٹرکشن کمشنر کو ہدایت دی تھی  کہ وہ ریاست بھر کے سرکاری اور غیر سرکاری سبھی اسکولوں میں پانی کی گھنٹی  بجانے کےاحکامات جاری کریں۔ وزیرتعلیم کی ہدایات پر کتنا عمل ہوا، اس بات کا  فی الحال پتہ نہیں چل پایا ، مگر انجمن  پرائمری اسکول کی انتظامیہ نے  بھی پانی کو صحت کا بہترین جز قرار دیتے ہوئے انجمن آزاد پرائمری اسکول میں اس کی شروعات کردی ہے۔ انجمن پرائمری اسکول بورڈ کے سکریٹری جناب محمد آصف دامدا نے بتایا کہ  بچوں کو وقفے وقفے سے پانی پلانا اُن کی صحت کےلئے نہایت مفید ہے اور ہم  عنقریب انجمن کے دیگر پرائمری  اسکولوں میں بھی اس منصوبے کو  شروع کررہے ہیں۔