نئی دہلی، 12/نومبر (ایس او نیوز /ایجنسی )وقف ترمیمی بل 2024 کی جوائنٹ پارلیمانی کمیٹی (جے پی سی) کی کارروائی پر اپوزیشن اراکین پارلیمنٹ نے دوبارہ اعتراضات اٹھائے ہیں۔ اپوزیشن اراکین نے جے پی سی کے چیئرمین پر الزام عائد کرتے ہوئے لوک سبھا اسپیکر اوم برلا کو خط لکھا ہے۔ اس خط میں انہوں نے ریاستی دوروں کے سلسلے میں اپنی ناراضگی کا اظہار کیا ہے، ان کا کہنا ہے کہ شکایات کے ازالے کی یقین دہانی کے باوجود چیئرمین جگدمبیکا پال نے ریاستوں کے دورے جاری رکھے ہیں۔ اس ناراضگی کے بعد اپوزیشن اراکین نے 5 ریاستوں کے دوروں کا بائیکاٹ کیا اور میٹنگوں میں کورم پورا نہ ہونے کا مسئلہ بھی اٹھایا ہے۔

اپوزیشن اراکین کی طرف سے عائد الزامات پر جے پی سی چیف جگدمبیکا پال کا بیان بھی سامنے آیا ہے۔ انھوں نے اپنے اوپر عائد الزامات کو مسترد کرتے ہوئے کہا ہے کہ ’’پارلیمانی کمیٹیوں کا مطالعہ ایک غیر رسمی عمل ہے۔ ان ریاستی دوروں میں کورم جیسا کوئی رسم نہیں ہوتا ہے۔‘‘ 9 نومبر کو لوک سبھا اسپیکر اوم برلا کو خط لکھنے کے بعد کچھ اپوزیشن اراکین نے کہا کہ ’’5 نومبر کو ہوئی میٹنگ کے بعد ہمیں امید تھی کہ جگدمبیکا پال کی قیادت میں جے پی سی کے ریاستی دوروں کو ملتوی کیا جائے گا۔‘‘ ان کا کہنا ہے کہ کمیٹی کی رپورٹ جمع کرنے کی کوئی فوری ضرورت نہیں تھی۔

خبر رساں ایجنسی پی ٹی آئی کی ایک رپورٹ کے مطابق جے پی سی چیف جگدمبیکا پال کے خلاف الزام عائد کرتے ہوئے لوک سبھا اسپیکر اوم برلا کو خط لکھنے والوں میں اے راجہ، محمد جاوید اور کلیان بنرجی شامل ہیں۔ انھوں نے کہا کہ انھیں بہت حیرانی ہوئی جب انھیں پتہ چلا کہ 9 نومبر سے شروع ہونے والے جے پی سی دورہ کو ملتوی نہیں کیا گیا تھا۔ اس لیے انھوں نے اس کا بائیکاٹ کرنا ہی مناسب سمجھا۔