بھٹکل میں زوردار بارش کا سلسلہ جاری؛ منڈلّی اسکول کی دیوار بیٹھ گئی - اسکول میں چھٹی رہنے سے ٹل گئی ٹریجڈی؛ اپسر گونڈا میں پہاڑی میں شگاف
بھٹکل 8 / اگست (ایس او نیوز) سنیچر کے دن پوری رات برسنے والی بھاری بارش کی وجہ سے منڈلّی میں واقع سرکاری اسکول نمبر 1 کی دیوار گر گئی اور چھت کا ایک حصہ بھی منہدم ہوگیا ۔ واردات اتوار کو پیش آئی۔ یہ تو اچھا ہوا کہ اتوار ہونے کی بنا پر اسکول میں چھٹی تھی، اس لئے ایک بڑا حادثہ ٹل گیا۔
دراصل منڈلّی کے اس اسکول کی دیواریں مٹی اور پتھروں سے تعمیر ہوئی تھیں اور اب بہت ہی پرانی اور خستہ ہوگئی ہیں ۔ شدید بارش کے دوران ایک کمرے کی دیوار گرنے کے نتیجہ میں دوسرے کمرے کی دیوار کو بھی نقصان پہنچا ہے ۔ جبکہ چھت کا ایک حصہ پوری طرح ٹوٹ پھوٹ گیا ہے ۔
واردات کے بعد مقامی ذمہ داران اور سرکاری افسران نے جائے وقوع پر پہنچ کر معائنہ کیا ۔
بتاتے چلیں کہ سنیچر اور اتوار کے ساتھ ساتھ آج پیر کو بھی بھٹکل میں موسلادھار بارش کا سلسلہ جاری ہے، جس کے نتیجے میں لوگوں کی عام زندگی مفلوج ہوکر رہ گئی ہے۔
اپسر گونڈا میں پہاری میں شگاف: ضلع شمالی کینرا کے پہاڑی علاقے میں بھاری برسات کا سلسلہ جاری ہے جس کا اثر کاروار، کمٹہ ، اور بھٹکل تعلقہ جات کے گاوں اور شہروں میں دکھائی دے رہا ہے ۔ اس دوران پڑوسی تعلقہ ہوناور کے اپسرگونڈا میں پہاڑی میں شگاف پیدا ہونے کے بعد وہاں قریب میں بسنے والے لوگوں کو ریلیف سینٹر میں منتقل کیا گیا ہے واقعے بعد ضلع انچارج وزیر کوٹا سرینواس پجاری نے جائے وقوع کا جائزہ لیا ہے۔
