اتحاد کے حق میں ووٹوں کی ہو رہی بارش: اکھلیش یادو
لکھیم پور کھیری،22؍اپریل(ایس او نیوز؍یو این آئی) سماجوادی پارٹی (ایس پی) سربراہ اکھلیش یادو نے دعوی کیا ہے کہ مودی حکومت کی پالیسیوں سے ناراض رائے دہندگان نئے ہندوستان اور نئے وزیر اعظم کی آس میں اتحاد کے حق میں ووٹوں کی برسات کرر ہے ہیں۔ راجکیہ انٹرکالج میدان میں ایک انتخابی ریلی سے خطاب کرتےہوئے مسٹر یادو نے پیر کو کہا کہ آج ملک کا آئین خطرے میں ہے۔ سیاست میں کافی گراوٹ آئی ہے۔ بی جے پی نیا ہندوستان بنانے کا جھوٹا خواب دکھا رہی ہے لیکن ملک کو جب نیا وزیر اعظم اور نئی حکومت ملے گی تبھی نئے ہندوستان کا تعمیر ہوگا۔ سیاست کو نئی سمت دینے والی سماج وادی پارٹی۔بہوجن سماج پارٹی اور راشٹریہ لوک دل کا مضبو ط اتحاد ہوا ہے۔ ہمار اتحاد دلوں کا ہے جو ٹوٹنے والا نہیں ہے۔
اکھلیش یادو نے کہا کہ جیسے جیسے انتخابی مرحلہ آگے بڑھ رہا ہے بی جے پی کو اس کی ناکامیوں کے لئے سبق سکھانے کے لئےاتحاد کے حق میں ووٹوں کی بارش ہورہی ہے۔ ہمارے تین پارٹیوں کے اتحاد کو مہاملاوٹی کہا جارہا ہے لیکن جو 38 پارٹیوں کے ساتھ اتحاد کئے ہوئے ہیں وہ بتائیں ان کا اتحاد مہاملاوٹی ہے کہ نہیں۔ ایس پی کا اتحاد ان غریبوں کا ہے جنہیں احترام نہیں ملا ہے۔ مسٹر یادو نے کہا کہ کسانوں کی روح اس کی کھیتی ہے۔ وزیر اعظم نے کسانوں کی آمدنی دوگنی کرنے کا وعدہ کیا تھا۔ ان کے بعد کھاد کی بوری سے پانچ کلو کھاد چوری کر کے کم کردی گئی۔ ہمیں ایسا چوکیدار نہیں چاہئے جو بڑے بڑے سرمایہ کاروں کو ملک کے باہر بھاگ جانے دیں۔ بینکوں سے 36000 سے زیادہ سرمایہ کار ہندوستان چھوڑ کر چلے گئے۔ نہ ہی کالا دھن واپس آیا اور نہ ہی بدعنوانی پر روک لگی۔
ایس پی سربراہ نے بجہرا، سیتا پور کی ریلی میں نکل دوبے کے حق میں انتخابی ریلی میں کہا کہ سماج کے سبھی طبقات کو ان کے آبادی کے اعتبار سے حصہ داری ملے گی۔ یہی سماجی انصاف کی بنیاد ہے۔ سوچئے بی جے پی کی حکومت میں کس کے اچھے دن آئے ہیں۔ نوجوانو ں کا مستقبل تاریک ہے۔ سوچھ بھارت کے نام پر عوام کو ٹھگا گیا ہے۔ وزیر اعلی کی ٹھوک دو کی سیاست کے چلتے کہیں پولیس نے عوام کو تو کہیں عوام نے پولیس کو ہی ٹھونکنے کا کام شروع کردیا ہے۔ انہوں نے عوام سے ہاتھی اور سائیکل والے بٹن دبا کر اتحاد کے امیدواروں کو جتانے کی اپیل کی۔