وشاکھاپٹنم،31؍جنوری (ایس او نیوز؍ایجنسی) آندھرا پردیش کے وزیر اعلیٰ جگن موہن ریڈی نے اعلان کیا ہے کہ ریاست کی اگلی راجدھانی وشاکھاپٹنم ہوگی۔ وزیر اعلیٰ ریڈی نے بین الاقوامی سفارتی اتحاد کی میٹنگ میں یہ اعلان کیا ہے۔ واضح رہے کہ 2014 میں تلنگانہ کو آندھرا پردیش سے جب الگ کیا گیا تو حیدر آباد کو 10 سال کے لیے دونوں ریاستوں کی مشترکہ راجدھانی بنایا گیا تھا۔ یہ مدت پوری ہونے کے بعد حیدر آباد کو تلنگانہ کے حوالے کرنے کا فیصلہ ہوا۔

وزیر اعلیٰ جگن موہن ریڈی نے اس سلسلے میں واضح کر دیا ہے کہ اب حیدر آباد کی جگہ آندھرا پردیش کی راجدھانی وشاکھاپٹنم ہوگی۔ انھوں نے بین الاقوامی سفارتی اتحاد کی میٹنگ سے خطاب کرتے ہوئے کہا کہ ’’یہاں میں آپ کو وشاکھاپٹنم میں مدعو کرنا چاہتا ہوں جو آنے والے دنوں میں ہماری راجدھانی ہوگی۔ میں بھی آنے والے مہینوں میں وشاکھاپٹنم میں منتقل ہو جاؤں گا۔‘‘