نئی دہلی،24؍ مارچ ( ایس او نیوز؍آئی این ایس انڈیا )ہندوستانی کپتان وراٹ کوہلی اگست ستمبر میں انگلینڈ کے خلاف ہونے والی ٹیسٹ سیریز کی تیاری کے لیے کاؤنٹی کرکٹ کھیلیں گے۔ابھی یہ طے نہیں ہے کہ وہ کس کاؤنٹی کے لئے کھیلیں گے لیکن امکان ہے کہ وہ سررے کیلئے کھیل سکتے ہیں۔بی سی سی آئی کے ایک سینئر افسر نے کہا کہ وراٹ ڈویژن ون کاؤنٹی ٹیم کے لئے کھلیں گے ۔اس سے زیادہ میں کچھ نہیں کہہ سکتا۔ سررے اور ایسیکس سے بات چل رہی ہے۔ہندوستانی کپتان کی پوری توجہ انگلینڈ دورے پر ہے اور وہ 14 جون کو افغانستان کے خلاف ٹیسٹ سے بھی باہر رہ سکتے ہیں۔وہ آئی پی ایل کا 11 واں سیشن ختم ہونے کے بعد انگلینڈ روانہ ہو جائیں گے۔انگلینڈ میں 2014 کے دورے پر وہ ناکام رہے اور ایک نصف سنچری بھی نہیں بنا سکے تھے۔اسٹیورٹ براڈ اور جیمز اینڈرسن نے آف اسٹمپ سے باہر جاتی گیندوں سے انہیں کافی پریشان کیا تھا۔چتیشور پجارا بھی یارکشر کے لئے اور ایشانت شرما ڈرہم کے لئے کاؤنٹی کرکٹ کھیلے گے۔