کولکاتہ، 18/جنوری (آئی این اٖیس انڈیا) مغربی بنگال میں اسمبلی انتخابات سے قبل سیاسی پارا بھی گرم  ہوگیا ہے۔ تازہ معاملہ کولکاتہ کا ہے۔ پیر کو یہاں بی جے پی کے روڈ شو پر پتھراؤ کیا گیا۔

اس روڈ شو میں مرکزی وزیر دیباشری چودھری، بی جے پی کے ریاستی صدر دلیپ گھوش اور زعفرانی خیمہ میں گزشتہ دنوں شامل ہونے والے شوبھندو ادھیکاری بھی شامل تھے۔خیال رہے کہ بھاجپا رہنماؤں نے ترنمول کانگریس کارکنوں پر حملے کا الزام عائد کیا ہے۔ شنیدکہ اس دوران دونوں جماعتوں کے کارکنوں کے مابین تصادم بھی ہوا، اس دوران ٹی ایم سی کی خواتین ونگ نے بھی بھاجپا ئی قائدین کو سیاہ جھنڈے دکھائے۔

اس سے قبل بی جے پی کے قومی صدر جے پی نڈا کے مغربی بنگال کے دورے پر قافلے پر 10 دسمبر کو سنگباری کی گئی تھی، اس میں پارٹی کے کچھ رہنما زخمی ہوئے تھے۔  وزیر اعلیٰ ممتا بنرجی نے پیر کے روز اسی نندی گرام اسمبلی سیٹ سے آئندہ الیکشن میں انتخاب لڑنے کا اعلان کیا ہے جہاں سے شوبھندو  ادھیکاری نے 2016 میں کامیابی حاصل کی تھی۔