وجئے پورہ، 23؍جون (ایس او نیوز) بھلے ہی کورونا وائرس سے ہر جگہ خوف و ہراس کی لہر پیدا ہورہی ہو اور کورونا انفیکشن سے ملک بے حال نظر آرہا ہو، مگر اس درمیان  ہندوستان میں اب تک کئی کورونا پازیٹو حاملہ خواتین نے بخیر و خوبی بچوں کو بھی جنم دیا ہے۔ ایسا ہی ایک معاملہ کرناٹک سے سامنے آیا ہے جہاں کورونا پازیٹو خاتون نے ایک نہیں بلکہ دو بچیوں کو جنم دیا ہے  ۔

اطلاع کے مطابق  وجئے پورہ میں  واقع ضلع اسپتال میں کورونا انفیکشن کا علاج کرانے والی ایک حاملہ خاتون نے دو بچیوں کو جنم دیا۔ اور نارمل ڈیلیوری ہوئی ۔  اسپتال کے سرجن ڈاکٹر شرنپا کاٹی نے اس سلسلے میں بتایا کہ ڈاکٹر منپریت کور تہرییا  کی قیادت میں  ڈاکٹروں کی ایک ٹیم نے  خاتون کو نارمل ڈیلیوری کرانے میں مدد کی۔ ڈاکٹر تہرییا جو اس خاتون کی دیکھ ریکھ کررہی ہے نے  بتایا کہ خاتون میں خون کی کمی ہے لہٰذا اس پر خصوصی توجہ دے جارہی ہے، البتہ  ماں اور دونوں بچیاں صحت مند ہیں۔ انھوں نے کہا کہ ایک بچی کا وزن 2 کلو گرام ہے جب کہ دوسری کا وزن 2.1 کلو گرام ہے۔

فی الحال  کورونا پازیٹو خاتون نے جن بچیوں کو جنم دیا ہے، ان کا  کورونا ٹیسٹ ہونا باقی ہے۔ جلد ہی ان کا کورونا ٹیسٹ کرایا جائے گا اور پھر برآمد ریزلٹ کے مطابق ڈاکٹرس آگے کی منصوبہ بندی کریں گے۔ فی الحال ماں اور دونوں بچیاں ڈاکٹروں کی سخت نگرانی میں ہیں۔