بھٹکل:18؍ جنوری(ایس اؤ نیوز )ایک بس ڈرائیور کی بیٹی ثناء علی خان اپنی غربت اور مشکلات کو پیچھے چھوڑتےہوئے کٹھن محنت ، اعتماد اور منزل کےلئے سخت کوشش کے بل بوتے  انڈین اسپیس ریسرچ سنٹر (اسرو) میں ٹکنیکل انجنئیرشعبہ میں بحیثیت معاون سائنس دان کے طورپر منتخب ہوئی ہیں۔

ثناءعلی ریاست  مدھیہ پردیش کے ودھیشہ ضلع سے تعلق رکھتی ہیں۔ اب  ثناءعلی ،اسرو کے  آندھراپردیش کے تروپتی ضلع کے شری ہری کوٹا کے ستیش دھون اسپیس ریسرچ سنٹر میں سائنس دان کے طورپراپنا مشن انجام دیں گی ۔ ثناء علی وھیشہ کے ستی۔اسمارٹ اشوک ٹکنیکل انسٹی ٹیوٹ سے بی ٹیک اور ایم ٹیک کی ڈگریاں حاصل کی ہیں۔ چونکہ والد کی کمائی بہت ہی کم تھی تو ثناء کو اپنی تعلیم مکمل کرنے کے لئے کئی مشکلات کا سامنا کرناپڑا۔ یہ راستہ آسان نہیں تھابلکہ ہر وقت  کانٹوں کے راستےپر چل کراپنی منزل کو پایا ہے۔  

ثناء علی کی اعلیٰ  کامیابی  کےلئے معاشی تنگدستی ، وسائل کی کمی کوئی رکاوٹ نہیں بنی ۔والد چونکہ ڈرائیور تھے تو ظاہر ہے اعلیٰ تعلیم کےاخراجات بساط سے باہر تھے۔ والد نے بھی دن رات محنت اور کوئی کسر نہیں چھوڑی اور جب ضرورت محسوس ہوئی تو انہوں نے قرض لے کر اپنی بیٹی کی تعلیم جاری رکھی ، آج وہ قرض میں ڈوبے ہوئے ہیں۔ اس کے علاوہ ثناء کی والدہ نے بھی اپنے تمام زیورات گروی رکھتے ہوئے بیٹی کو آسمان چھونے میں تعاون کیا ہے۔ اس کے ساتھ ساتھ ثناء اخراجات کو پورا کرنے کے لئے  بچوں کو ٹیوشن  بھی دیا کرتی تھیں۔  اپنی  ابتدائی تعلیم سے ہی ایک لگن اور مقصد لے کر نکلی ثناء علی کو فلکیات اور خلاء کے موضوع سے دلچسپی رہی ہے۔ اپنے بھرپور اعتماد کے ساتھ تعلیمی میدان میں ترقی کرتےہوئے اپنی لوہا لینے والی اہلیت و قابلیت کے ذریعے  مشکل حالات میں بھی چاند کو چھونے کاخواب پورا کیا ہے۔ سال 2022میں گوالیار کے انجنئیر اکرم سے شادی کرنے  والی  ثناء علی کا کہنا ہےکہ میری تعلیمی ترقی میں میرے شوہر،ساس سسر اور رشتہ داروں کا بڑا رول رہاہے۔ مدھیہ پردیش  کے وزیراعلیٰ شیوراج سنگھ چوہان اور مرکزی وزیر جیوتی رادھیہ سندھیا نے بھی ٹیوٹ کرتےہوئےثناء علی کو مبارکبادی دی ہے۔

ثناء علی نوجوان سائنس دان کی حیثیت سےمنتخب ہونےکے بعد مسرت بھرے لہجےمیں کہاکہ ’’میں ایک متوسط گھرانے میں پلی بڑھی لڑکی ہوں، میں میری طرح کی سبھی لڑکیوں سے یہی کہنا چاہتی ہوں کہ زندگی میں کئی مسائل آتے ہیں لیکن ان پر دھیان نہ دیں ، اپنی تعلیم پوری کرنےپر توجہ دیں اور کٹھن محنت اورلگن سے جینا سیکھیں تبھی کامیابی ملتی ہے۔ دنیا میں کچھ بھی ناممکن نہیں ہے، بس محنت کرنا سیکھیں اور کبھی تھکن محسوس نہ کریں ۔ ‘‘