بھٹکل،  31 / اگست (ایس او نیوز) ٹاون میونسپل کاونسل کے صدر اور نائب صدر کے انتخاب کی تاریخ گزرنے کے دس دن بعد بھی صدر کا عہدہ خالی رہنے کے باوجود منتخب نائب صدر محی الدین الطاف کھروری کو صدر کے اختیارات کا چارج نہیں ملا ہے ۔

چونکہ اس مرتبہ عہدوں کے ریزرویشن میں بھٹکل ٹی ایم سی کے لئے صدر کا عہدہ درج فہرست ذات کی خاتون کے لئے مختص کیا گیا تھا اور اس طبقے سے کاونسلر موجود نہ ہونے کی وجہ سے 20 اگست کو ہوئے انتخاب میں صرف نائب صدر کو بلا مقابلہ منتخب کیا گیا تھا ۔ توقع کی جا رہی تھی کہ صدر کی غیر موجودگی کی وجہ سے صدر کے تمام اختیارات نائب صدر جناب الطاف کھروری کو حاصل رہیں گے ۔ لیکن دس دن گزرنے کے بعد بھی ایسا لگتا ہے کہ دلّی ابھی دور ہے ۔

اسسٹنٹ کمشنر چھٹی پر :صدر کے اختیارات نائب صدر کو تفویض کرنے کے تعلق سے اس سے قبل ایڈمنسٹریٹر کی ذمہ داری نبھانے والی اسسٹنٹ کمشنر کو اقدام کرنا چاہیے تھا ۔ مگر اس وقت اسسٹنٹ کمشنر ڈاکٹر نئینا چھٹی پر چلی گئی ہیں ۔ کمٹہ کی اسسٹنٹ کمشنر اس وقت بھٹکل اے سی کی ذمہ داری نبھا رہی ہیں لیکن وہ اختیارات کی تفویض کے سلسلے میں کوئی توجہ نہیں دے رہی ہیں ۔ معلوم ہوا ہے کہ اس الجھن کو دور کرنے کے سلسلے میں ضلع ڈپٹی کمشنر کی طرف سے اقدام کرنے کا یقین دلایا گیا ہے ۔

کیا کہتے ہیں قوانین: میونسپل قوانین کے مطابق صدر کی جانشینی کی تقرری یا الیکشن تک یا سات دن سے زیادہ کسی بھی مدت کے لیے صدر کی غیر موجودگی میں نائب صدر ہی قائم مقام صدر ہوتا ہے اور نائب صدر کو ہی صدر کے تمام اختیارات حاصل ہوتے ہیں ۔ اس تعلق سے  الطاف کھروری کا استدلال یہ ہے کہ چونکہ صدر کے عہدے کے لیے کوئی انتخاب نہیں ہوا اس لئے ضابطے کے مطابق انہیں صدر کے اختیارات تفویض ہونے چاہئیں۔ اسی کے ساتھ  الطاف کھروری کا گمان یہ بھی ہے کہ انہیں اختیارات تفویض  نہ کرنے کے پیچھے   سیاسی کھیل بھی ہوسکتا ہے۔

جب ٹی ایم سی کے قوانین کے بارے میں چیف آفیسر نیل کنٹھ میستا سے پوچھا گیا تو انہوں نے بتایا کہ اختیارات تفویض کرنا میرا کام نہیں ہے ۔ لیکن اس کے بارے میں واضح طور پر مجھے بھی معلوم نہیں ہے ۔ چونکہ اس بارے میں سوال اٹھ رہے ہیں اس لئے میں نے اس معاملہ میں وضاحت کرنے کے لئے اپنے اعلیٰ افسروں کو مراسلہ بھیجا ہے ۔ 

کیا ریزرویشن میں تبدیلی کا انتظار ہو رہا ہے ؟ :صدر کے عہدے کے لئے مختص کیے گئے زمرے میں کوئی کاونسلر موجود نہ رہنے کی وجہ سے حکومت کی طرف سے زمرہ تبدیل کرنے کے امکانات ہیں اور کچھ لوگ اس پر نظر بنائے ہوئے ہیں ۔ سمجھا جاتا ہے کہ اس وجہ سے بھی صدر کے اختیارات نائب صدر کو تفویض کرنے کے سلسلے میں تاخیر کی جا رہی ہے ۔ 

اب دیکھنا یہ ہے کہ اگلے چند دنوں میں ضلع انتظامیہ کی جانب سے اس معاملے میں کیا وضاحت سامنے آتی ہے اور کیا اقدام کیا جاتا ہے؟