منگلورو 15/ جون (ایس او نیوز)انٹر نیشنل ایئر پورٹ کی طرف جانے والی شہر کی اہم ترین سڑک پر واقع مرور پُل میں بھاری بارش کی وجہ سے شگاف پیدا ہونے کے بعد اس راستے پر ٹریفک اور پیدل آمد و رفت مکمل بند کردی گئی ہے۔

    اس پُل کا ایک حصہ تقریباً تین فٹ تک نیچے کھسک گیا ہے اور بہت ہی خطرناک حالت میں نظر آرہا ہے۔ دوسری طرف ڈیم سے نکلنے والا زائد پانی اس کے ایک حصہ پر سے ہوکر گزر رہا ہے۔ مقامی لوگوں کا خیال ہے کہ اس برڈج کے نیچے بہنے والی گروپور ندی میں ریت مافیا کے ذریعہ پل کے کھمبوں کے پاس ہی بڑے پیمانے پر غیر قانونی طور ریت نکالنے کی وجہ سے شاید اس پل میں شگاف پیدا ہوگئے ہیں اور وہ دھنسنے کی حالت میں آگیا ہے۔

    جنوبی کینرا ضلع میں یہ دوسرا پل ہے جو تعمیر کے بعد تین سال کے اندر دھنس گیا ہے۔ اس سے پہلے بنٹوال میں مولارپٹنا پل بھی دھنس گیا تھا۔ 

    موقع پر پہنچنے والے پولیس کمشنر ششی کمار  نے بتایا کہ فالگونی ندی پر واقع پل کو بجپے ایئر پورٹ کے راستے سے جوڑنے والے حصے میں دو کھمبے دھنس گئے ہیں۔ اس وقت یہ پل موٹر گاڑیوں یا پیدل سفر  کے لئے قابل استعمال نہیں ہے۔ اس لئے ٹریفک کو دو متبادل راستوں پر موڑ دیا گیا ہے۔ اُڈپی سے ایئر پورٹ کے راستے پر جانے والے لوگوں کو اڈپی - مُلکی - کنی گولی - کتیل - بجپے کا راستہ اپنانا ہوگا۔ جبکہ منگلورو اور کاسرگوڈ سے آنے والوں کو ننتور - وامنجور - گوروپور - کائکمبا - بجپے کا راستہ استعمال کرنا ہوگا۔