رابرٹ واڈرا نے پیشگی ضمانت کو چیلنج دینے والی ای ڈی کی درخواست کی مخالفت کی
نئی دہلی،26/ستمبر(ایس او نیوز/ آئی این ایس انڈیا) انفورسمنٹ ڈائریکٹوریٹ (ای ڈی) نے دہلی ہائی کورٹ سے کہا کہ رابرٹ واڈرا کو حراست میں لے کر ان سے پوچھ گچھ کرنے کی ضرورت ہے کیونکہ دولت کے لین دین سے مبینہ طور پر ان کا براہ راست تعلق ہے۔ای ڈی نے جسٹس چندر شیکھر کے سامنے کہا کہ کانگریس سربراہ سونیا گاندھی کے داماد واڈرا اپنے خلاف منی لانڈرنگ کیس کی تحقیقات میں تعاون نہیں کر رہے ہیں۔واڈرا کے وکیل نے ای ڈی کے دعووں کو مسترد کرتے ہوئے کہا کہ ایجنسی جب کبھی ان کے موکل کو بلاتی ہے، وہ اس کے سامنے پیش ہوتے ہیں اور انہوں نے تحقیقات میں مکمل تعاون کیا ہے۔وکیل نے یہ بھی کہا کہ ای ڈی نے جو سوال کئے، ان کے کلائنٹ نے ان کا جواب دیا اور ان پر لگائے گئے الزامات کو قبول نہ کرنے کا یہ مطلب نہیں ہے کہ وہ تعاون نہیں کر رہے ہیں۔دلیلیں سننے کے بعد عدالت نے کیس پر آخری بحث کے لئے پانچ نومبر کی تاریخ مقرر کی۔زیریں عدالت نے واڈرا کو پیشگی ضمانت دے دی تھی جسے ای ڈی نے ہائی کورٹ میں چیلنج کیا ہے۔واڈرا پر لندن میں 17 کروڑ روپے کی جائیداد کی خریداری میں منی لانڈرنگ کا الزام ہے۔آپ کوبتا دیں کہ اس سے پہلے منگلوار کو رابرٹ واڈرا نے دہلی ہائی کورٹ میں ای ڈی کی اس عرضی کی مخالفت کی ہے جس میں منی لانڈرنگ کے معاملے میں ان کی پیشگی ضمانت کو چیلنج دیاگیا ہے۔ واڈرا نے اپنے جواب میں کہا کہ اس طرح کی کوئی بات نہیں ہے کہ انہوں نے تحقیقات میں تعاون نہ کیا ہو اور ثبوتوں کے ساتھ چھیڑ چھاڑ کرنے کا بھی کوئی اندیشہ نہیں ہے کیونکہ ای ڈی ان کے پاس سے کیس سے متعلق تمام دستاویزات کو پہلے ہی قبضہ کر چکی ہے۔انہوں نے دعوی کیا کہ ای ڈی بے مطلب کی تحقیقات کر رہی ہے اور اس کے پاس ان کے خلاف الزامات کی حمایت میں کچھ بھی مواد نہیں ہے۔معاملے پر سماعت کے لئے آج کی تاریخ مقرر کی گئی تھی۔