بھٹکل 16 جون (ایس او نیوز)   تعلقہ اور ضلعی انتظامیہ کے تعاون سے قومی سماجی ادارہ مجلس اصلاح و تنظیم  کی طرف سے گذشتہ روز     رابطہ ہال میں  کورونا ویکسی نیشن کے کامیاب انعقاد کے بعد  اب جمعرات کو تنظیم ہال میں  45 سال یا اس سے زائد عمر والوں کے لئے  کووڈ  ٹیکہ کاری کا  ایک روزہ کیمپ منعقد کیا گیا ہے جس سے  بھٹکل کے نشیبی علاقوں اور  پرانے  محلوں  کے  لوگ فائدہ اُٹھاسکیں گے۔

اخبارنویسوں سے گفتگو کرتے ہوئے  تنظیم کےمیڈیا کوآرڈینیٹرڈاکٹر محمد حنیف شباب صاحب نے بتایا کہ   رابطہ ہال میں منعقدہ کیمپ میں حصہ لیتےہوئے   2000 سے زائد لوگوں نے کورونا   ٹیکہ لیا تھا بالخصوص این آر آئیز کے لوگ بھی  مستفید ہوئے تھے، اب چونکہ   شہر میں بارش کا سلسلہ جاری ہے اور لوگوں کو ویکسی نیشن کےلئے  سرکار ی اسپتال یا دیگر   سینٹروں میں جانے آنے  میں دشواریاں پیش آرہی ہیں، اس لئے اس بار  تعلقہ اور ضلعی انتظامیہ کے تعاون سے  نشیبی علاقوں کے   لوگوں کو آسانی  فراہم کرتے ہوئے تنظیم ہال (صدیق اسٹریٹ)  میں    ویکسی نیشن کیمپ رکھا گیا ہے۔ کیمپ صبح نو بجے سے  4:30 بجے تک چلے گا۔

واضح رہے کہ کورونا وباء پر قابو پانے کے لئے ایک طرف ضلعی اور تعلقہ انتظامیہ  متحرک ہوکر ہر ممکن اقدامات کرنے میں لگی ہوئی ہے،  وہیں دوسری طرف  بھٹکل کا  قومی سماجی ادارہ مجلس اصلاح و تنظیم کی  قیادت  میں  بھٹکل مسلم یوتھ   فیڈریشن، رابطہ سوسائٹی اور  انڈین نوائط فورم  وغیرہ بھی  اس وباء پر قابو پانے   اپنی حد تک کوششوں میں مصروف ہیں۔

تنظیم کی طرف سے عوام الناس سے درخواست کی گئی ہے کہ وہ  جمعرات کو منعقدہ    اس کیمپ سے فائدہ اُٹھائیں اور پہلی فرصت میں ویکسین  کی پہلی خوراک لیں۔  اخبارنویسوں سے گفتگو کرتے ہوئے ڈاکٹر حنیف شباب نے بتایا کہ      اس طرح کے ویکسی نیشن کیمپ  آئندہ بھی  رکھنے کی کوشش کی جائے گی، بالخصوص این آر آئیز کے لئے  ویکسی نیشن کے دوسرے ڈوس کے لئے بھی عنقریب  ویکسی نیشن کیمپ منعقد کرنے کی کوشش کی جائے گی۔