نینی تال، 21؍اکتوبر (ایس او نیوز؍ایجنسی) اتراکھنڈ میں ضلع نینی تال کے آفت زدہ گرمپانی-خیرنا اور کینچی علاقوں میں پھنسے 500 سیاحوں کو بچا لیا گیا ہے جبکہ ملبے سے چار لاشیں نکال لی گئیں۔ کوچی دھام، خیرنا، کاکڑی گھاٹ اور گرم پانی علاقوں میں سڑکیں منقطع ہونے سے یہاں 500 سے زائد سیاح اور مسافر پھنسے ہوئے تھے۔ ڈسٹرکٹ مجسٹریٹ ڈی ایس گاربیل نے ہندوستانی فوج کی ڈوگرہ ریجمنٹ کو یہاں ریسکیو اور ریلیف کے کام کے لیے کل ہی یہاں بلایا تھا۔

فوج کے 100 جوان تقریباً 30 سے ​​35 کلومیٹر پیدل چلنے کے بعد کل دوپہر یہاں پہنچے اور یہاں کے لوگوں کے لیے راحت رسانی کا عمل شروع کر دیا۔ ڈپٹی انسپکٹر جنرل پولیس نیشیل آنند بھیرنے نے کمان سنبھالی اور الموڑہ اور نینی تال پولیس کے اہلکاروں نے یہاں پھنسے 500 سے زائد سیاحوں کو وادی سے نکال کر محفوظ مقامات پر بھیج دیا۔ سینئر سپرنٹنڈنٹ آف پولیس (ایس ایس پی) پریتی پریادرشینی نے بتایا کہ منگل سے اب تک 1500 افراد کو ریسکو کیا گیا ہے۔

دریں اثنا کینچی دھام اور بوہرا کوٹ دیہات میں ملبے تلے دبے چار افراد کی لاشیں آج نکالی گئیں۔ منگل کو کینچی دھام میں منہدم ہونے والے گھر کے ملبے تلے 21 برس کی ریچا اور اٹھارہ سال کا نوجوان ابھیشیک دب گئے۔ دونوں کی لاشیں آج برآمد ہوئیں۔ اسی طرح دو بزرگ شمبھو دت ڈالاکوٹی اور بسنت ڈالاکوٹی رام گڑھ کے بوہراکوٹ میں ملبے کی وجہ سے لاپتہ ہو گئے تھے۔ ان کی لاشیں بھی برآمد کر لی گئیں۔