ضلع شمالی کینرا پارلیمانی حلقہ: سب سے زیادہ اور سب سے کم پولنگ کے اعداد وشمار؛ ہلیال کے ایک بوتھ پرسو فیصدی پولنگ
بھٹکل 2/مئی (ایس او نیوز) ضلع شمالی کینرا میں پارلیمانی سیٹ کے لئے 23اپریل کو جو پولنگ ہوئی تھی، اس کے بارے میں جواعدادوشمار ڈسٹرکٹ الیکشن کمیشن کی طرف سے جاری کیے گئے ہیں اس سے معلوم ہوتا ہے کہ ضلع کے 508پولنگ بوتھس میں 80 فیصد سے بھی زائد پولنگ ہوئی ہے۔جبکہ 5مقامات ایسے ہیں جہاں پر 50 فیصدسے بھی کم پولنگ ہوئی ہے۔
رپورٹ کے مطابق ہلیال کے سرکاری لوئیر پرائمری کنڑا اسکول والے بوتھ میں 100 فیصد پولنگ بھی درج کی گئی ہے۔شمالی کینرا پارلیمانی حلقے میں شامل بیلگاوی ضلع کے خانہ پور اسمبلی حلقے کے گَؤلی سرکاری مراہٹی ہائیر پرائمری اسکول کے بوتھ میں حالانکہ 614 ووٹرس کو اپنا حق رائے دہی استعمال کرنا تھا، مگر یہاں پر صرف 2 افراد نے ہی اپنا ووٹ ڈالا ہے۔اسی پولنگ بوتھ سے قریب واقع لونڈا سرکاری مراہٹی ہایئر پرائمری اسکول میں 43.39 فیصد پولنگ ریکارڈ کی گئی ہے۔کاروار کے سی برڈ بحری اڈے میں واقع کیندریہ ودیالیہ کے بوتھ میں 8.84 فیصد پولنگ ہونے کی بات بھی سامنے آئی ہے۔
جن علاقوں میں 80 فیصد سے زیاد ہ پولنگ ہوئی ہے اس میں یلاپور اور منڈگوڈ سب سے آگے ہیں۔یہاں پر 116پولنگ بوتھس میں سب سے زیادہ پولنگ ریکارڈ کی گئی ہے جبکہ دوسرے مقام پر سرسی سداپور کا علاقہ ہے جہاں 141 بوتھس میں سب سے زیادہ پولنگ ہوئی ہے۔