کاروار 27؍مارچ (ایس او نیوز) ضلع شمالی کینرا کی پارلیمانی نشست کے لئے بی جے پی کے اننت کمار ہیگڈے کے مقابلے میں جنتادل اور کانگریس کے مشترکہ امیدوار آنند اسنوٹیکر کا میدان میں اترنا طے ہوگیا ہے۔ 

چونکہ کینرا سیٹ پر انتخاب دوسرے مرحلے میں ہونے والا ہے اس لئے یہاں نامزدگی داخل کرنے کی تاریخ 28مارچ سے 4اپریل تک رکھی گئی ہے۔ پتہ چلا ہے اسنوٹیکر اپنا نامزدگی فارم 30مارچ کو داخل کرنے والے ہیں جبکہ اننت کمار ہیگڈے کے بارے میں پتہ چلا ہے کہ وہ 2اپریل کو اپنی نامزدگی داخل کریں گے۔

پہلی مرتبہ اننت کمار اور اسنوٹیکرکی ٹکر : پارلیمانی سیٹ پر گزشتہ پانچ مرتبہ اپنی جیت درج کرنے والے اننت کمار کا مقابلہ اس بار پارلیمانی الیکشن میں پہلی مرتبہ میدان میں اترنے والے آنند اسنوٹیکر سے ہونے جارہا ہے۔خیال رہے کہ ضلع شمالی کینرا میں جنتادل ایس کا کوئی اثر نہ ہونے اور یہ کانگریس کاگڑھ ہونے کی وجہ سے یہاں پر جنتادل ایس کے بجائے کانگریس کے امیدوار کا مطالبہ کیا جارہا تھا۔ لیکن مخلوط ریاستی حکومت کے بیچ سیٹوں کی تقسیم کا جو فیصلہ ہوا ہے اس کے مطابق کینرا سیٹ کو جنتادل ایس کے لیے ہی مختص کیاگیا اور آنند اسنوٹیکر کو میدان میں اتارا گیا ہے۔

آنند اسنوٹیکر کی سیاسی زندگی کی اگر بات کریں تو اس سے پہلے کاروار انکولہ حلقے سے دو بار اسمبلی الیکشن جیت چکے ہیں اور ایک مرتبہ وزارت کا قلمدان بھی سنبھال چکے ہیں، جبکہ گزشتہ دو مرتبہ انہیں اسمبلی الیکشن میں شکست کا منھ دیکھنا پڑا ہے۔جبکہ چھ مرتبہ پارلیمانی سیٹ پر مقابلہ کرنے والے اننت کمار ہیگڈے نے ایک مرتبہ ہار اور پانچ مرتبہ جیت کا سامنا کیا ہے۔

جنتاپریوار کو کبھی جیت نہیں ملی : کینر اسیٹ پر اس سے قبل کانگریس نے اپنے مختلف امیدواروں کے ذریعے دس مرتبہ جیت حاصل کی ہے۔ جبکہ کبھی جنتاپارٹی، کبھی جنتا دل اور کبھی جنتاد سیکیولر کے نام پرکئی مرتبہ اپنا امیدوار یہاں سے میدان میں تارنے کے باوجود جنتا پریوار نے کبھی بھی یہاں جیت کا منھ نہیں دیکھا ہے۔ اب کینرا سیٹ کی تاریخ میں پہلی مرتبہ جنتادل اور کانگریس کا مشترکہ امیدوار یہاں پر بی جے پی کے مقابلے میں سامنے آیا ہے۔

کانگریس ضلع صدر کی حمایت: کانگریس کے ضلع صدر بھیمنّا نائک کے مطابق پارٹی ہائی کمان کا فیصلہ قبول کرتے ہوئے تمام کانگریسی لیڈران اور کارکنان آنند اسنوٹیکر کی جیت کو یقینی بنانے کے لئے پوری طرح سرگرم ہوجائیں گے۔ نامزدگی داخل کرنے کے موقع پر کانگریسی لیڈران بھی اسنوٹیکر کے ساتھ شامل رہیں گے۔دوسری طرف یلاپور منڈگوڈ حلقے کے رکن اسمبلی شیورام ہیبار کا کہنا ہے کہ انہیں مشترکہ امیدوار کے تعلق سے باضابطہ طور پر کسی قسم کی اطلاع نہیں دی گئی ہے۔ اگر پارٹی کی طرف سے مشترکہ امیدوار کے لئے تشہیری مہم میں حصہ لینے کے لئے ان سے کہا جاتا ہے تو وہ پارٹی کاحکم ضرور مانیں گے۔

دیشپانڈے کیا کریں گے؟: سیاسی گلیاروں میں یہ چہ میگوئیاں زوروں پر ہیں کہ کینرا سیٹ پر آنند اسنوٹیکر کو امیدوار بنانے سے ضلع انچارج وزیر آر وی دیشپانڈے خوش نہیں ہیں۔اس لئے یہ سوال گردش کررہا ہے کہ کیا اسنوٹیکر کی طر ف سے نامزدگی فارم داخل کرنے کے موقع پر دیشپانڈے موجود رہیں گے اور کیا وہ آئندہ تشہیری مہم میں حصہ لیں گے۔اس کے علاوہ کانگریس کے موجودہ اور سابق اراکین اسمبلی اسنوٹیکر کی تشہیری مہم میں حصہ لیں گے یا نہیں اس پر بھی لوگوں کی نظریں لگی ہوئی ہیں۔