بھٹکل11/اگست (ایس او نیوز) پیر کو رکن پارلیمان اننت کمار ہیگڈے نے بھٹکل کا دورہ کرتے ہوئے  بھٹکل تعلقہ میں ’پردھان منتری گرام سڑک یوجنا‘کے تحت 23.72کروڑ روپے لاگت کے مختلف ترقیاتی منصوبوں کو ہری جھنڈی دکھائی۔ وہ یہاں ماروتی نگر میں بی جے پی تعلقہ آفس کا افتتاح کرنے کے بعد خطاب کررہے تھے۔

ہیگڈے نے جن منصوبہ جات کو ہری جھنڈی دکھائی اس میں مرڈیشور ہری کنترا کیری سے نیشنل ہائی وے 66 تک، نیرگدّے کراس، تودلّی مندر تک 6.78کلو میٹر کی سڑک، نیشنل ہائی وے ساگر روڈ ہوڈیل گرام، گندلگی، مورکوڈی مراٹھی کیری کی 11.09کلومیٹر لمبی سڑک وغیرہ شامل ہے۔

 اس پس منظر میں بات کرتے ہوئے اننت کمار ہیگڈے نے کہا کہ دیہاتی علاقوں میں رہنے والے باشندے بنیادی سہولتوں سے محروم نہ ہوں، اس مقصد سے قریو ں اور قصبوں میں پردھان منتری سڑک یوجنا کے تحت راستوں کی تعمیر کی جارہی ہے۔ کیونکہ دیہاتوں کی ترقی سے ہی دیش کی ترقی ہوتی ہے۔ اس موقع پر رکن اسمبلی سنیل نائک، ایم ایل سی شانتا رام سیدّی وغیرہ موجود تھے۔