سیلاب زدگان کے لئے ریلیف کا مطالبہ۔شمالی کینرا کے اراکین اسمبلی اور بی جے پی لیڈروں کے وفد نے کی وزیر اعلیٰ سے ملاقات
کاروار10/ستمبر (ایس او نیوز) ضلع شمالی کینرا میں گزشتہ مہینے میں موسلادھار برسات کی وجہ سے مختلف مقامات پر جو سیلاب آیا تھااور سیکڑوں خاندان متاثر ہوئے ان کے لئے مناسب ریلیف کا مطالبہ لے کر ضلع کے رکن پارلیمان اننت کمار ہیگڈے کی قیادت میں اراکین اسمبلی اور بی جے پی لیڈران کے ایک وفد نے وزیراعلیٰ بی ایس ایڈی یورپا سے ملاقات کی۔
معلوم ہوا ہے کہ وزیر اعلیٰ سے ملاقات کے دوران وفد کی طرف سے سیلاب سے متاثرہ مقامات اور خاندانوں کی تفصیلات اور ہونے والے نقصانات کا تخمینہ پیش کیا گیا۔ اس کے ردعمل میں وزیر اعلیٰ نے اس بات پرمعذرت کا اظہار کیا کہ وہ ضلع کا دور ہ کرنے اور سیلاب زدگان سے ملاقاتیں کرنے کا موقع نکال نہیں پائے۔ ساتھ ہی انہوں نے اس بات کا بھی یقین دلایا کہ جلد ہی وہ ضلع کا دورہ کریں گے اور حالات کا جائزہ لینے کے بعدمتاثرین کو زیادہ سے زیادہ امداد فراہم کریں گے۔
بتایا جاتا ہے کہ اس موقع پرکاروار انکولہ حلقے کی رکن اسمبلی روپالی نائک نے وزیر اعلیٰ سے ماہی گیروں کے لئے بھی راحت رسانی کرنے اور ای۔ پراپرٹی اور این اے کے قوانین کو آسان کرنے کی بھی درخواست کی۔روپالی نائک نے وزیراعلیٰ سے مطالبہ کیاکہ ضلع میں مچھلیوں کے اندر بیماری پیدا ہوجانے سے ماہی گیروں کی زندگی مشکل میں پڑ گئی ہے۔ اس لئے ماہی گیروں کو فی خاندان 10ہزار روپے مالی امداد فراہم کی جائے۔ اس کے علاوہ کاروار کدرا ڈیم کے علاقے میں پانی چھوڑنے سے جو سیلاب آیا تھا اس میں نقصان اٹھانے والوں کے لئے امداد کا مطالبہ کرتے ہوئے روپالی نائک نے کہا کہ جن کی دکانیں سیلاب میں پوری طرح تباہ ہوگئی ہیں انہیں فی کس 10ہزار روپے کی امداد فراہم کی جائے۔اور جن مکانات کو نقصان پہنچا ہے انہیں فی خاندان 1لاکھ روپے اور جو مکانات مکمل طور پر گر گئے ہیں ان کے لئے فی خاندان 5لاکھ روپے کا معاوضہ جاری کیاجائے۔
وزیراعلیٰ سے ملاقات کے اس موقع پر بی جے پی کے ضلع صدر کے جی نائک، رکن اسمبلی دینکر شیٹی، روپالی نائک، سنیل نائک، سابق رکن اسمبلی شنیل ہیگڈے، بی جے پی ضلع جنرل سیکریٹری این ایس ہیگڈے اور وینکٹیش نائیک وغیرہ موجود تھے۔