اُترکنڑا ڈسٹرکٹ انچارج منسٹر شیورام ہیبار کا بھٹکل دورہ؛ کوروناسے متاثرہ تینوں صحتیاب لوگوں کو دی گئی ہیلتھ سرٹی فیکٹ؛
بھٹکل 23/اپریل (ایس او نیوز) بھٹکل میں کوویڈ۔19 سے متاثرہ تین لوگوں کے صحت یاب ہونے کے بعد ان کی کورنٹائن میعاد ختم ہونے پر تینوں کو ڈسٹرکٹ انچارج منسٹر کی موجودگی میں کورنٹائن سینٹر سے بھی وداع کیا گیا۔ اس موقع پر انچارج وزیر شیورام ہیبار نے تینوں کو صحت یاب ہونے پر مبارکباد پیش کی، انہیں پھولوں کی مالا پہنائیں اسی طرح تینوں کو ہیلتھ سرٹی فیکٹ سے بھی نوازا۔
اس موقع پر گفتگو کرتے ہوئے شیورام ہیبار نے بھٹکل میں لاک ڈاون کو کامیاب بنانے پر بھٹکل کے عوام کے تعریف کی اسی طرح انہوں نے مجلس اصلاح و تنظیم کے ذریعے عوام کے لئے دی جارہی خدمات کی بھی سراہنا کی ساتھ ساتھ اسپتال کے ڈاکٹروں، اسٹاف اور آشا کارکنوں کی بھی سراہنا کرتے ہوئے اُن کی خدمات پر شکریہ ادا کیا۔
اس موقع پر مقامی رکن اسمبلی سنیل نائک، اسپتال کے ڈاکٹرس، اسٹاف، ہیلتھ آفسرس، سماجی کارکنان ، مجلس اصلاح و تنظیم اور بھٹکل مسلم یوتھ فیڈریشن کے کافی ذمہ داران موجود تھے۔
بعد میں شیورام ہیبار نے اخبار نویسوں سے بھی گفتگو کی اور بھٹکل کےعوام سے درخواست کی کہ عوام لاک ڈاون کا پالن کریں اور گھروں سے باہر نہ نکلیں، ہم آپ کے گھروں تک آپ کی ضروریات کی چیزیں فراہم کررہے ہیں، اس کے لئے ہر طرح کی سہولیات فراہم کررہے ہیں، مزید کہا کہ عوام کو لاک ڈاون سے تکلیفات تو ہوگی لیکن کورونا وائرس کو بھگانے کے لئے یہ ضروری ہے اس کے لئے عوام سے ہماری یہی درخواست ہے کہ آپ انتظامیہ کا ساتھ دیں۔ اس موقع پر ڈپٹی کمشنر ڈاکٹر ہریش کمار، اسسٹنٹ کمشنر بھرت، ڈی وائی ایس پی گوتم، ضلع پنچایت صدر جئے شری موگیر و دیگر لوگ موجود تھے۔