ضلع شمالی کینرا میں 6اوربیلگاوی میں2پارلیمانی نشستوں کے لئے آج سے پرچہ نامزدگی داخل کرنے کا آغاز
کاروار28؍مارچ (ایس او نیوز)الیکشن کمیشن کے شیڈول کے مطابق ضلع شمالی کینرا کی 6اورضلع بیلگاوی کی 2نشستوں کے لئے پرچہ نامزدگی داخل کرنے کا عمل 28مارچ سے شروع ہورہا ہے اور اس کی آخری تاریخ 4اپریل ہوگی۔ جبکہ 5اپریل سے کاغذات نامزدگی کامعائنہ کیا جائے گا اور 8اپریل امیدوار کی طرف سے اپنا نام واپس لینے کی آخری تاریخ ہوگی۔انتخابات میں حصہ لینے والے امیدوار چھٹی کا دن چھوڑ کر کسی بھی دن صبح 11بجے سے دوپہر 3بجے درمیان اپنے کاغذات نامزدگی داخل کرسکیں گے۔
ضلع شمالی کینرا کی6 نشستوں کے لئے جملہ 1,437پولنگ بوتھس ہیں۔ان بوتھس کے لئے ضلع ڈپٹی کمشنر کی نگرانی میں ای وی ایم اور وی وی پیاٹ مشینیں تقسیم کی گئیں۔ کچھ دنوں پہلے ان تمام مشینوں کا ماہرین کے ذریعے معائنہ کیاگیا تھا اور ان کے ٹھیک ٹھاک حالت میں ہونے کی تصدیق کرلی گئی تھی۔ضلع انتظامیہ کے افسران نے ان مشینوں کو ہر پارلیمانی حلقے سے متعلق انچارج آفیسرکے حوالے کیا۔ہر پولنگ بوتھ کے لئے ایک مشین اور کوئی ایمرجنسی پیدا ہونے کی صورت میں اضافی مشین کے ساتھ جملہ 1656ای وی ایم مشینیں اور 1727وی وی پیاٹ مشینیں تقسیم کی گئی ہیں۔
پارلیمانی حلقوں تک ای وی ایم اور وی وی پیاٹ مشینیں لانے اور لے جانے کے لئے جو گاڑیاں استعمال کی گئی ہیں ان میں جی پی ایس کا استعمال کیا گیا ہے اور نقل وحمل کی تمام حرکات پرڈپٹی کمشنر کے دفتر سے نظر رکھنے کا انتظام کیا گیا ہے۔ کینرا سیٹ پرکل ووٹروں کی تعداد1534036ہے جس میں مردوں کی تعداد 7,78,350 اورخواتین کی تعداد7,55,678ہے۔ کاروار میں سب سے زیادہ اور یلاپور میں سب سے کم ووٹرس موجود ہیں۔کاروار میں مردوں سے زیادہ خواتین ووٹرس کی تعداد ہے۔
ضلع انتظامیہ افسران کا کہنا ہے کہ ہر پولنگ بوتھ کے لئے بجلی کا کنکشن، پینے کے پانی کا انتظام، بیت الخلاء، اور ووٹنگ کے لئے ضروری دوسرے سازوسامان کا پوراانتظام کردیاگیا ہے۔ ہر پارلیمانی حلقے میں جہاں معذور رائے دہندگان کی تعداد زیادہ ہے وہاں پر ایک ماڈل پولنگ بوتھ ایسے معذورین کے لئے مخصوص کیا گیا ہے، جس کا رنگ نیلا ہوگا۔ضلع شمالی کینرا میں فی الحال 12,913افرادکانام معذورووٹرس کے طورپرفہرست میں درج ہے۔اس کے علاوہ نابینا ووٹرس کے لئے بریئل رسم الخط میں ووٹنگ کی سہولت کا انتظام کیا گیا ہے۔