کاروار:7؍مارچ  (ایس اؤ نیوز) اترکینرا کے رکن پارلیمان اننت کمار ہیگڈے آج کل بیمار چل رہے ہیں۔ اننت کمار بیمار کیا ہوئے ان  کے حمایتیوں میں بحث  چل پڑی  ہےکہ  کیا اننت کمار ہیگڈے  بیماری کے بہانے اگلے انتخابات میں سیاست سے کنارہ کشی اختیار کریں گے؟ اسی طرح  بی جے پی کے اندر بھی یہ بحث  جاری ہےکہ انتخابات میں اننت کمار ہیگڈے کا متبادل امیدوار کون ہوگا؟   پارٹی اور حمایتیوں کے اندر جاری بحث کو دیکھیں تو کہا جاسکتاہے کہ اننت کمار ہیگڈے گزشتہ انتخابات کے دوران بھی کہہ رہے تھے کہ وہ انتخابی سیاست کو الوداع کہیں گے مگر ویسا نہیں ہوا۔ کیا اس مرتبہ بھی ویسا ہی ہوگا یا پھر کچھ اور گل کھلائے  جائیں گے دیکھنا دلچسپ ہوگا۔

اننت کمار ہیگڈے بیمار ہوئے تو ڈاکٹروں نے مشورہ دیا کہ وہ آرام کریں اور عوامی پروگراموں اور ملاقات سے دور رہیں۔ یہی سبب بھی ہے کہ پچھلے چند دنوں سے اننت کمار ہیگڈے اپنے حلقہ میں کہیں نظر نہیں آرہے تھے۔ حلقہ کے عوام یہی سمجھ رہے تھے کہ وہ دہلی میں ہیں، جب کہ عوام کو یہ بھی پتہ نہیں تھا کہ وہ بیمار ہیں اور ان کا آپریشن ہواہے۔ یہ سب کچھ ان کی سیاسی چال کی طرح راز میں ہی تھا، اب خود ان کے دفتر کی طرف سے ان کے بیمار ہونےکی جانکاری دی گئی ہے۔ یہ جانکاری بھی جو دی گئی ہے وہ اس لئے نہیں کہ انہیں اپنے  حلقہ کے عوام سے ملاقات کرنا ممکن نہیں ہوگا ، نہیں، بلکہ اصل مقصد یہ بتایا جارہاہے کہ وہ اگلے انتخابات میں بی جے پی کے امیدوار نہیں ہونگے ، اس لئے بی جےپی ابھی سے متبادل امیدوار ڈھونڈلے ۔ ایم پی کے  ہیلتھ بلٹین میں کچھ ایسا ہی سوال کھڑا کیا گیا ہے۔

 کہا جارہا ہے کہ ہندوتوا کی جدوجہد سمیت کئی ایک وجوہات کی بنا پر اننت کمار ہیگڈے پولس کے بے شمار ڈنڈوں سے پیٹے جانےپر اندر  سے ٹوٹ چکے تھے۔وہ بہت ہی لاغر ہوگئے تھے۔ لیکن اس وقت کی مار کا درد اب رہ رہ کے انہیں ستا رہاہے۔اننت کمار ہیگڈے  پچھلے کچھ برسوں سے پیٹھ درد اور پیر درد میں مبتلا ہونےکی وجہ سے ہی گزشتہ لوک سبھا انتخابات کے دوران  ہی سیاسی کنارہ کشی  اختیار  کرنے کی بات کہی تھی ۔ لیکن سیاست  سے چھٹکارے کا ارادہ ظاہرکرنےکے باوجود آخری لمحات میں انہیں کو بی جےپی کا امیدوار بنائے جانے کی بات خود اننت کمارہیگڈے نے مرکزی وزیر بنائےجانے کے بعد منعقدہ ایک پروگرام میں کہی تھی۔

اترکینرا لوک سبھا سے جیت حاصل کرنے کے بعد بھی وہ عوامی پروگراموں اور رابطے سے دور دور ہی تھے۔ مگر کچھ ماہ پہلے دوبارہ پیٹھ اور پیروں میں درد شروع ہوا تو ڈاکٹروں نے مشورہ دیا تھاکہ اب فوری طورپر  سرجری کرنا ضروری ہے۔ کچھ دن پہلے ہوئے بڑے آپریشن کے بعد وہ آہستہ آہستہ روبہ صحت ہیں لیکن ڈاکٹروں  نے کہا ہے کہ  ان کو  طویل عرصہ تک  آرام کرنا ہوگا  اور مکمل صحت یاب ہونے تک عوامی پروگراموں اور ملاقاتوں سے پرہیز کرنا ہوگا۔ان کے پرسنل سیکریٹری نے پریس ریلیز میں بتایا ہے کہ اسی وجہ سے  وہ عوام کے لئےمیسر  نہیں ہیں۔ متعلقہ پریس ریلیز  میں    ایم پی اننت کمار ہیگڈے کے سرگرم سیاست  میں شریک ہونے پر بھی سوالیہ نشان لگایاگیا ہے۔

کہا جارہا ہے کہ پانچ مرتبہ اترکینرا حلقہ سے بی جےپی کے رکن پارلیمان کی حیثیت سے منتخب ہونے والے اننت کمار ہیگڈے حالیہ برسوں میں سیاست سے الگ ہونے کے متعلق غور کررہے تھے۔ لیکن بی جے پی میں کوئی مضبوط امیدوار نہ ہونے کی وجہ سے انہی کو بار بار ٹکٹ دیا جارہا تھا، مگر اب آئندہ انتخابات میں  ہیگڈے  کھڑے نہیں ہوں گے تو ان کی جگہ کس اُمیدوار کو موقع دیا جاتا ہے، یہ دیکھنا دلچسپ ہوگا۔