لکھنؤ،21؍اگست (ایس او نیوز؍یو این آئی) عام انتخابات 2019 میں شکست فاش کے تقریبا تین مہینوں کے بعد سماج وادی پارٹی(ایس پی) نے 13 اسمبلی سیٹوں پر ہونے والے ضمنی انتخابات کو ملحوظ رکھتے ہوئے پارٹی کے تنظیمی ڈھانے میں بہتری کے اقدام شروع کردئے ہیں۔

ذرائع کے مطابق انتخابات میں شکست فاش ودیگر مسائل پر تبادلہ خیال کرنے اور ضمنی انتخابات کی حکمت عملی تیارکر نے کے لئے جلد ہی پارٹی کی مجلس عاملہ کی میٹنگ منعقد ہوسکتی ہے۔سماج وادی پارٹی ہریانہ اسمبلی انتخابات میں حصہ نہیں لے گی لیکن اپنے ہم خیال پارٹی کے سپورٹ کا اعلان کرسکتی ہے۔نام ظاہر نہ کرنے کی شرط پر پارٹی کے ایک سینئر لیڈر نے بتایا کہ لوک سبھا انتخابات میں شکست فاش کے بعد اعلی کمان کی توجہ مکمل طور سے پارٹی کی تنظیم نو پر ہے۔

ایس پی کے ذرائع کے مطابق ہمار مقصد بی جے پی کو آنے والے ضمنی انتخابات اور ریاستی اسمبلی انتخابات میں بی جے پی کو گھیرنا ہے۔پارٹی کارکنوں اور لیڈروں تک پہلے سے ہی یہ پیغام پہنچایا جاچکا ہے کہ وہ ووٹروں تک پہنچ کر یوگی حکومت کی ناکامیوں سے انہیں آگاہ کریں۔

قابل ذکر ہے کہ لوک سبھا انتخابات میں قنوج، بدایوں اور فیروزآباد پارلیمانی حلقوں میں ہار کے بعد سماج وادی پارٹی کو زبردست دھچکا لگا تھا۔عام انتخابات میں پارٹی کو صرف 5 پارلیمانی سیٹوں پر جیت حاصل ہوئی تھی۔اور اس وقت سماج وادی پارٹی میں اندرون خانہ اختلافات، سینئر لیڈروں کے بی جے پی میں شمولیت،دن بدن کمزور ہوتا تنظیمی ڈھانچہ جیسی متعدد مسائل کا سامنا ہے۔