یوم جمہوریہ کے موقع پر حب الوطنی کے سیلاب میں ڈوبا اتر پردیش
لکھنؤ،26؍جنوری(ایس او نیوز؍یو این آئی) دارالحکومت لکھنؤ سمیت مکمل اترپردیش میں منگل کو 72ویں یوم جمہوریہ کے موقع پر حب الوطنی کے سیلاب میں غوطے لگاتا نظر آرہا ہے۔ اہم تقریب ودھان بھون کے سامنے منعقد کی گئی جہاں گورنر آنندی بین پٹیل نے پرچم کشائی کی اور پریڈ کی سلامی لی۔ اس دوران وزیراعلی یوگی آدتیہ ناتھ اور ان کے کابینہ کے اراکین کے علاوہ بڑی تعداد میں شائقین موجود رہے۔ اس موقع پر اسمبلی اور دیگر سرکاری عمارتوں اور تاریخی یادگاروں کو دلہن کی طرح سجایا گیا تھا۔
پریڈ کے دوران موجود شائقین نے بھارت ماتا کی جے کے نعرے لگا کر سلامتی دستوں کی حوصلہ افزائی کی۔ چار باغ سے نکلی پولیس، پی اے سی کی ٹکڑیوں کے علاوہ فوج کے جوانوں نے بھی پریڈ میں حصہ لیا۔ ٹینک پر سوار جوان سلامی دے رہے تھے۔ پریڈ میں شامل ٹی -90 ٹینک، آرمڈ ریکوری ویہل اور آئی سی سی بی ایم پی -2 نے ملک کی بہادری کی کہانیاں کہہ رہے تھے۔ شوریہ چکر سے نوازے گئے پریڈ کماندر لیفٹننٹ کرنل پرشانت چنڈاوت کی قیادت میں فوج کے جوانوں نے قدم تال کی۔
کورونا کے تئیں لوگوں کو بیدار کرنے کے ارادے سے پریڈ میں شامل جوان ماسک لگائے ہوئے تھے۔ فوج کی راجپوت ریجیمنٹ اور جاٹ ریجیمنٹ نے پریڈ میں حصہ لیا۔ اس کے علاوہ مرکزی ریزرو پولیس فورس کی ٹکڑیاں، پی اے سی، ایس ایس بی کے جوان، پولیس کی خاتون اور مرد ٹکڑیاں، این سی سی کیڈٹ، آرمی اسکول کے بچے بینڈ اور پائپ پر بج رہے حب الوطنی کے نغموں کی دھن پر قدم تال کر رہے تھے۔