کاروار:28؍مئی(ایس اؤ نیوز) کرونا وائرس کی وجہ سے ملتوی کئےگئے پی یودوم کا انگریزی پرچہ 18جون کو منعقد کئے جانے کا حکومت نے فیصلہ لیا ہے۔ طلبا کی صحت کا خیال رکھتےہوئے انہیں امتحان میں حاضری کے لئے کافی کچھ سہولیات فراہم کئے گئےہیں۔ اگر ان  سہولیات سے استفادہ کیا جاتاہے تو ایک اندازے کے مطابق اترکنڑا ضلع کے 197طلبا بیرونی اضلاع سے امتحانات میں شریک ہونے کی اطلاعات موصول ہوئی ہیں۔

4مارچ سے شروع ہوئے پی یو دوم کے سالانہ امتحانات کا آخری انگریزی مضمون کا پرچہ لاک ڈاؤن سے ایک دن پہلے طئے ہوا تھا لیکن وائرس کے خوف سے اس کو ملتوی کیاگیا۔ ہاسٹل میں مقیم طلبا لاک ڈاؤن کی وجہ سے اپنے اپنے گھر چلے گئے۔ اب 18جون کو انہیں متعلقہ امتحانی مرکز پہنچ کر امتحان میں شریک ہونے میں پیش آنے والی مشکلات کو دیکھتے ہوئے پی یو بورڈ نے ایسے طلبا کو اپنے متعلقہ اضلاع کے قریبی امتحان گاہ میں ہی پرچہ لکھنے کی سہولت فراہم کی ہے۔ اس سلسلے میں بورڈ نے متعلقہ اضلاع سے ہاسٹل میں قیام پذیر طلبا کی فہرست حاصل کرتےہوئے انہیں قریبی امتحان گاہوں میں نشست فراہم کرنے کا انتظام کررہی ہے۔

اترکنڑا ضلع ڈی ڈی پی یو بگلی ایس ایم نے بتایا کہ  اترکنڑا ضلع کے 197طلبا اپنے مقیم اضلاع کے قریبی امتحان گاہوں سے ہی پرچہ لکھیں گے اور اہم نے انہی جانکاریوں کو سمیٹ کر  پی یو بورڈ کو تمام تفصیلات ارسال کی ہیں۔