کاروار:28؍جون(ایس اؤ نیوز) ملک بھر میں  ہجومی تشدد(ماب لنچنگ) قتل کی سخت مذمت کرتے ہوئے قانون کی بالادستی اور امن وامان بنائے رکھنے  کےلئے ایسی کارستانیوں پر روک لگانے کی مانگ لے کر اترکنڑا ضلع رابطہ ملت نے کاروار  ڈپٹی کمشنر کی معرفت عزت مآب صدر ہندکے نام  میمورنڈم پیش کیا جس میں مجرموں کو سخت سزا دینے کی مانگ کی گئی ہے۔

میمورنڈم میں کہاگیا ہے کہ مذہبی جنون کثیر مذہبی تہذیب کے لئے نقصان دہ ہے، گزشتہ 2-3برسوں سے ہجومی تشدد کے واقعات میں اضافہ ہواہے اور بغیر کسی خوف کے انجام دینے سے ملک کے شہری خوف کے ماحول میں زندگی گزاررہے ہیں۔ یہاں صدیوں سے ہندو مسلم بھائی چارگی سےرہتے آئے ہیں لیکن مرکز میں بی جے پی کی حکومت آنے کے بعد  ماب لنچنگ کے نام پر کئی ایک قتل ہوئے ہیں، میمورنڈم کے مطابق ماب لنچنگ دراصل سیاسی مفاد کے لئے کیا جارہاہے اور یہ آپس میں نفرت پیدا کرنے کی منصوبہ بندسازش  ہے۔ مزید بتایا گیا ہے کہ  گائے سپلائی ، گائے کے گوشت، لوجہاد وغیرہ کے بہانے ملک میں اقلیتوں پر خاص کر مسلمانوں پر مسلسل ہجومی تشدد کے ذریعے حملے ہورہے ہیں، سب کچھ ہوتے دیکھ کربھی  افسران خاموش تماشائی بنے ہوئے ہیں، مجرم اپنے جرم کے بعد بھی کھلے عام گھومنے سے قانون کی قدر و قیمت مٹتی جارہی ہے۔

میمورنڈم میں کہا گیا ہے کہ جھارکھنڈ میں تبریز انصاری کا بائک چوری کے بہانے جے شری رام، جئے ہنومان کے نعروں پرزور زبردستی کرتے ہوئے قاتلانہ حملہ کیا گیا اور اس کی وڈیو سوشیل میڈیا پر پھیلائی گئی ۔ جس سے ملک بھر میں  خوف کا ماحول پیدا ہورہاہے۔ ان حالات پر وزیراعظم، وزراء ، ارکان پارلیمان کی خاموشی ، قانون کے محافظوں کا اپنے فرائض سے غفلت سب کچھ ملک کے حالات کو سنگین بنارہے ہیں۔میمورنڈم میں صدرہند کو  ملک کی سالمیت، یک جہتی  اور  بھائی چارگی کو برباد کرنے والوں کے خلاف  مداخلت کرتے ہوئے مجرموں کو سخت سزادینے کا مطالبہ کیا گیا ہے۔

 رابطہ ملت اُترکنڑا کے ضلعی جنرل سکریٹری محمد طلحہ سدی باپا کی قیادت میں  ڈپٹی کمشنر دفتر میں اُن کی غیر موجودگی میں کاروار اسسٹنٹ کمشنر نے  میمورنڈم  کو وصول کیا۔ اس موقع پر سکریٹری مظفر شیخ کمٹہ ، محمد اقبال شیخ  کاروار، سید خلیل اللہ خان کاروار، عبدالمناف سرسی ، عبدالقادر تلولی ، محمد اسماعیل گوڈلی سمیت  رابطہ ملت  کے پریس سکریٹری محمد رضامانوی  موجود تھے۔