اترکنڑا ضلع میں کوروناوائرس سے بندر بخار بیماری کا خوف زیادہ :اب تک 68معاملات پوزیٹیو
سرسی:30؍اپریل(ایس اؤ نیوز) اترکنڑا ضلع میں کورونا وائرس سے زیادہ کیاسنور جنگل بیماری (کے ایف ڈی )عرف عام بندر بخار کا خوف پھیل رہاہے۔ فروری سے ابھی تک ضلع میں کل 68بندر بخار معاملات کی تصدیق ہونے کی جانکاری دی گئی ہے۔کروناوائرس کو لے کر حکومتوں اور میڈیا کی ہنگامی خیزی سے یہ معاملات زیادہ منظر عام پر نہیں آنے کی بات کہی جارہی ہے۔
یہ مرض زیادہ تر مزدور طبقہ اور زرعی پیشہ افراد میں نظر آتا ہے، اسی طرح متعلقہ بیماری کی وجہ سے جنگلات کے سرحدو ں پر رہائش پذیر عوام کی نیندیں حرام ہوگئی ہیں۔ اترکنڑا ضلع کے 6تعلقہ جات میں بندر بخار کے معاملات کا پتہ چلاہے، خاص کر اپریل کے مہینے میں زیادہ معاملات درج ہوئے ہیں۔ دراصل کروناوائرس کے ہنگامے میں بندر بخار کے معاملات دب سے گئے ہیں۔
سال 2018میں سداپور، ہوناور، بھٹکل ، جوئیڈا تعلقہ جات میں نظر آئی بندربخار بیماری 2019میں سرسی، انکولہ، کمٹہ میں بھی دیکھی گئی ہے۔ اس طرح اترکنڑا ضلع کے 7تعلقہ جات بندر بخار بیماری میں مبتلا علاقوں کی فہرست میں شامل کئے گئے ہیں۔ اس مرتبہ جوئیڈا کے گوند، کمباروڑاجیسے علاقوں میں یہ بیماری دیکھی گئی ہے، اس سلسلے میں صحت عامہ کے افسران کا کہنا ہے کہ پچھلے کئی دہوں سے ان علاقوں میں یہ بیماری دیکھی نہیں گئی تھی ۔
گزشتہ سال جنوری کے مہینے میں پہلے معاملے کاپتہ چلا تھا امسال فروری میں پہلا معاملہ درج ہواہے، مارچ آخر تک صرف 27 لوگ بندر بخار سے متاثر تھے ، اپریل کے مہینے میں اچانک تعداد میں اضافہ ہواہے اور 41افراد کی رپورٹ پوزیٹیو آئی ہے۔ امسال بندروں کی موت میں بھی اضافہ ہواہے۔ ابھی تک 113سے زائد بندروں کی موت ہوچکی ہے۔ سداپور تعلقہ میں ہی 80فی صد بندرہلاک ہونے کی ذرائع نے خبر دی ہے۔ افسران کا کہنا ہے کہ بندروں کی ہلاکت، انسانوں کا جنگلات میں گھومنا پھرنا اور جنگلی جانوروں کی چہل پہل سے یہ بیماری پھیلتی ہے۔ عام طورپر یہ بیماری بزرگوں پر حملہ کرتی ہے، اس مرتبہ بچوں کو بھی متعلقہ بیماری میں مبتلا دیکھاگیا ہے۔ ایسے علاقوں میں گھروں کے اطراف دوائی کا چھڑکاؤ کرنے کی جانکاری دی گئی ہے۔ ضلع میڈیکل آفیسر ڈاکٹر اشوک کمار کا کہنا ہے کہ لاک ڈاؤن کی وجہ سے دیہی لوگ کہیں بھی مزدور ی کے لئے نہیں گئے بدلے میں وہ زیادہ تر جنگلا ت کا رخ کرتے ہوئے لکڑیاں ، چارہ وغیرہ لانے لگے تو اپریل میں مریضوں کی تعداد میں اضافہ ہوا ہے۔ انجکشن دئیے جارہے ہیں۔ بیداری مہم بھی چلائی جارہی ہے۔ ضلع کے 68معاملات میں سداپور تعلقہ میں 45، ہوناور میں 14،جوئیڈا میں 6اور انکولہ، کمٹہ ، بھٹکل میں ایک ایک معاملے درج ہوئے ہیں۔