کاروار:11؍ اپریل(ایس اؤ نیوز) گذشتہ پانچ چھدنوں سے سرکاری ٹرانسپورٹ ملازمین احتجاج پر ہیں۔ لیکن اتوار سے حالات میں تھوڑی بہت تبدیلی ہوتی نظر آرہی ہے کیونکہ ٹرانسپورٹ آفسران نے خبر دی ہے کہ سرکاری ٹرانسپورٹ کے چند ملازمین ڈیوٹی پر حاضر ہوگئے ہیں۔ انہوں نےبتایا کہ اترکنڑا ضلع کے مختلف تعلقہ جات میں اتوار کو 29سرکاری بسیں سڑکوں پر اتر چکی ہیں جبکہ پیر کو مزید بسوں کی سروس شروع ہونے کی توقع ہے۔
سرکاری ٹرانسپورٹ سرسی زون کے افسر راج کمار نے بتایا کہ انکولہ سے 12،کاروار اور کمٹہ سے پانچ پانچ، سرسی سے تین اور یلاپور سے ایک بس مقامی سڑکوں پر اترتے ہوئے مسافروں کو ایک جگہ سے دوسری جگہ پر پہنچانے میں کام پر آچکے ہیں۔ افسر نے بتایا کہ دراصل اتوار کو 50بسوں کو شروع کرنے کی کوشش کی گئی تھی مگر اتوار کو چھٹی ہونے کہ وجہ سے زیادہ بسیں سڑکوں پر نہیں اتر سکی ہیں۔ افسرکے مطابق 70فی صد ملازمین ڈیوٹی پر حاضری دینے کے لئے تیار ہیں، لیکن کچھ لوگ سدراہ بنے ہوئے ہیں۔ البتہ ہم نے اپنی کوشش جاری رکھی ہے انہوں نے پیر کو قریب 100بسیں شروع کئے جانے کا امکان جتایا۔ راج کمار نے بتایا کہ پہلے پہل ضلعی سطح پر بسوں کی آمد ورفت ہوگی پھر اس کے بعد بین الاضلاع ٹرانسپورٹیشن شروع کی جائے گی۔
سرکاری بسیں نہ ہونےکی وجہ سے پرائیویٹ سواریوں کی طرف سے زیادہ کرایہ وصول کئےجانےکی شکایتیں بھی موصول ہوئی ہیں۔ سرکاری بسوں کے احتجاج کی وجہ سے عوام پریشان ہیں اور اس کے دوبارہ شروع ہونے کے انتظار میں ہیں۔