بھٹکل:24؍جنوری (ایس او نیوز) اترکنڑا ضلع میں بغیر کسی سبب کے اتی کر م داروں کی عرضیوں کو رد کئے جانےکی مذمت کرتے ہوئے فروری کے پہلے ہفتہ میں ’’کاروار چلو ‘‘کے ذریعے احتجاج کیا جائے گا۔ اس بات کی جانکاری اتی کرم دار سنگھا کے لیڈر رویندر نائک نے دی ۔ وہ یہاں جمعرات کو پرائیویٹ ہوٹل میں  فاریسٹ اتی کرم داروں کی میٹنگ کے بعد منعقدہ پریس کانفرنس میں بات کررہے تھے۔

انہوں نے کہاکہ ضلع انتظامیہ اتی کرم داروں کو  نظر انداز کر رہی ہے۔ 80فی صد عرضیوں کو رد کئے جانے سے اتی کرم دارو ں کی پریشانیوں میں اضافہ ہوگیاہے۔ بھٹکل میں فاریسٹ افسران کا اتی کرم داروں  پر ظلم حد سے زیادہ بڑھ گیا ہے۔ ضلع کے ارکان اسمبلی  ہوں یا  رکن پارلیمان کوئی بھی اس طرف توجہ دینے کے لئے تیار نہیں ہے، ان سب کو دیکھتے ہوئے اتی کرم داروں کو احتجاج کے سوا کوئی اور راستہ نہیں بچا  ہے۔انہوں نے اعلان کیا کہ ضلعی انتظامیہ کو بیدارکرنے کے مقصد سے اب بالاخر ضلع کے ہرتعلقہ میں اتی کرم داروں کا  ’کاروار چلو‘ احتجاج کا اہتمام کیا گیا ہے ۔ انہوں نے متنبہ کیا کہ احتجاج کے باوجود اگر ضلعی انتظامیہ کی طرف سے مناسب حل نہیں نکلاتو دو ہزار سے زائد اتی کرم دار بنگلورو پہنچ کر ودھان سودھا کا گھیراؤ کریں گے ۔ انہوں نے مانگ کی کہ آنے والے ودھان سبھا اور لوک سبھا کے اجلاس میں اترکنڑا ضلع کے اتی کرم داروں کے مسئلہ پر بحث کی جائے۔

بھٹکل اتی کرم دار سنگھا کے صدر راماموگیر نے بتایا کہ محکمہ جنگلات کے آفسران بھٹکل میں اتی کرم داروں کے خلاف جھوٹے مقدمات دائر کرتےہوئے لوگوں کو ہراساں کرنے میں لگے ہوئے   ہیں۔ انہوں نے وارننگ دی کہ اتی کرم داروں پر جاری زور زبردستی ختم نہیں کی گئی  تو فاریسٹ دفتر کے روبرو سخت احتجاج کیا جائے گا۔ وکیل دینکر پی بی، گنپتی نائک جالی ، منیر احمد، سلیمان ، رضوان، دیوراج ، چندر گونڈا، دیوداس جالی وغیرہ موجود تھے۔